Resubelpara, May 8, 2022:North Garo Hills a•jani skotong songjinma Resubelpara-ni Jonglapara Community Hall-o Resubelpara Block Youth Trinamool Congress Committee (BYTCC)-ko songe gital dilgiparangko Sonibar salo seokangaha.
Ia tom•anio bang•a ritchani ritcha chadamberang aro AITC dolna chake kamko ka•giparang bang•a buchuma budepa, me•apa me•chikmarang bakko ra•angtokaha ine u•iataha.
Indake tom•anio Resubelpara Block Youth Trinamool Congress-ko songan baksana re•baenggipa 2023 bilsini eleksino maikai AITC dolko cheatna man•gen, iani gimin chanchirimaniko dakangaha. Tom•anio Rongrong elekka-ni MDC Rinaldo K. Sangma aro AITC, NGH-ni District President aro Kharkutta elekka-ni candidate ong•e re•baenggipa Assembly eleksino susana am•enggipa Cherak W. Momin bakko ra•angaha.
“Angni skango Congress dolo dongmitingo angna dakchakgipa pilak ma•a paarang aro jong-ada no abirang da•alo angni AITC dolona napangoba ang baksa ong•kuenga ine anga nikna gita man•a. Da•alo ia tom•aniona bakko ra•na re•bagiparangko niksoe anga bebe ra•a, na•simang da•alona kingkingba Dr. Mukul Sangma-o ka•donga. Chinga NGH-ni ning•o donggipa ge•bri elekkarango AITC-ni candidate-ko cheatna jotton ka•anggen” ine Rinaldo Sangma aganangaha.
“An•chingni a•dokko dilenggipa Conrad Sangma da•alo an•chingko dilsretenga. Ua District Council aro Sima arini kajia golmalko maming chanchia gri an•tangni namgnina ja•kuko de•aha. Meghalaya a•dokni aro Garo Hills a•jani silroro namroroaniko nikna gita an•ching gital dilgiparangko seokna nangchongmotenga” ine Kharkutta elekka-ni MDC Cherak W. Momin aganangskaha.
Resubelpara Congress dolni gitcham District Youth President, Bathier Momin, chadamberangni gun aro kragipa dilgiparangko seokna nangani bidingo jinmana agantalate on•angaha. Ia tom•anio bakko ra•anggipa manderang jinma apsan chanchirime chadamberangni dilgiparangko seokangjolaha.
Gital seokako man•gipa Resubelpara Block Youth Trinamool Congress Committee-ni dilgiparanga Sengbath Marak-President, Salning Marak, Brithuel Momin, Sengran Momin- Vice President, Nicholas Sangma- Secretary, Kasan Sangma, Sengjan Sangma aro Keny Sangma- Joint Secretary, Babut Momin- Organizing Secretary, Twatyan Momin- Accountant, Treasurer- Bonkam Arengh, Games and Sports Cultural Secretary- Chanang Marak, Social Media Co-ordinator- Sundeep N Marak, Adviser- Rinaldo K. Sangma aro Sofic Marak ong•achim.