Tura, March 7, 2023: Eleksin-na campaign ka•miting somoio NPP-ni dilgiparang BJP-ko Anti-Kristian aro jat tangnasan chakaia ine matnangaha. Uni gisepon, a•songni PM Narendra Modi aro Union Home Minister Amit Shah, Conrad Sangma-ni Skotong Minister-na ku•mikchetani salo bakko ra•na re•baniara kraani ong•ama ine Tura-ni MDC Bernard N.Marak sing•doangaha.
Batanggipa eleksin-na kam ka•miting somoio NPP-ni dilgiparang BJP dolko bang•en chonnikaha aro kal•stekaha. BJP Corruption-na mitchigipa ong•a aro PM Narendra Modi an•tangan corruption-na “red flag” ko on•aha. NPP maina BJP-ko agan-mittake manderangni nachilo namgijako gipate cha•bokaha. Indide Conrad Sangma-ra maini gimin PM Narendra Modi aro Union Home Minister Amit Shah-ko an•tangni Skotong Minister-na ku•mikchetani salo re•bae bak ra•china okamataha ine Bernard Marak sing•doataha.
BJP-ko NPP-ni dilgiparang mikchepe aganmittakeba maio pangchake BJP-ni dilgiparangko okamataha. NPP manderangni gisiko BJP-ko Anti-Kristian ine chonnikaha. NPP-ni indakgipa kattarangko tol•anichi manderangni gisikko so•sojengjeng ong•ataha. BJP-ko Anti-Kristian ine matnangani bidingo talate on•genchimoba, manderangni gisiko bebe ra•na amjajok. Maina NPP, BJP baksa bakrimgenchimoba, aganmittake roaha. NPP, BJP baksa bakrimpile kam ka•na nangnikode, BJP-ni dilgiparango kema bi•na nanga. NPP, BJP-ni gimin tol•e aganani bidingo manderangna talate on•naba nanga. BJP maming saloba Kristian toromko chonnikja. NPP-ni ka•rimskarangsa manderangna indakgipa kattarangko gipataha. NPP Corrupted ong•gipa dol ong•a, Uni gimin BJP baksa bakrime kamko ka•na krachongmotja. NPP, BJP-ni dilgipa Narendra Modi aro Amit Shah, Kristian toromko bon•atna kamko ka•enga ine matnanganiara BJP-ni Karyakarta-ko pe•ani ong•a. Iani bidingo BJP dilgiparang name chanchichengna nanga. BJP Garo Hills-o maina cherikja, Anti-Kristian ine matnanggipa kattarangko gipataha ine Bernard Marak parakataha.
NPP-ni dilgiparango sing•na nanganide, “BJP-ara Anti-Kristian ong•chongmotama ? Ong•genchimode, maina BJP baksa bakrime kamrangko ka•na miksongenga ” ineba Bernard Marak sing•doangaha.