Tura, Dec 6, 2022: Novembirth Ch.Marak, jean re•baenggipa 2023 bilaini Assembly eleksino 59-Chokpot Constituency-oni susana am•engachim, ua gelna man•telgijagipa a•selrangni bidingo Republican Party of India (RPI) Athawale (A) dolo South Garo Hills-ni Incharge, ong•e kam ka•aoni aro Garo Hills Region-ni Spokesperson ong•aoni December 6 tarik Monggolbar salo ong•kataha ine koborna u•iataha.
Novembirth Marak-ni u•iatani gitade, RPI (A) Meghalaya NE, India-ni President-na kam watani lekkako Monggolbar salo watataha. Indake ua Monggolbar sal dipet RPI (A) dolo maming bak rengsi dongjaha ine u•iataha.
Uni gimin RPI (A) mikkangchi dolko bilakatna re•dilanio chu•sokgipa aro dal•rorogipa ong•china, Novembirth Marak an•tangni nama sikaniko on•ataha.
Ua (Novembirth) mikkangchi jat aro a•songna dangdike on•na an•tangko on•kange re•mikkanganiko dontongjawa aro dingchikbate kamrangko ka•angkuagen ineba parakataha.