Shillong, July 7,2022: Manipur a•jao Northeast Womens’ Football League-ko ong•atchengani salo Meghalaya a•dok Assam a•dok baksa kal•susae 6-1 goalrangko chipna man•ne cheaha.
Uamang Manipur a•dokona apsan salon sokange kal•susanio cheaha.Nisilia Majaw changgittam joljol goalrangko chipaha, indake Sunalinda Lawren, Brace aro Lawanlang Nongbet goalprakko chipskaha.
Ia League-ko ong•atengipa Rajasthan-ni Anantapura Sports Events, bak ra•gipa player-rang sakprakan gong hajal 50-ko man•gen aro chegipa dol gong lak 5-ko man•skagen ine parakataha.
A•dok ge•antian kal•giparang sak 12 ong•na nanggen aro a•song wilwilaoni gipin sak 4 seokgiminko ong•atgiparang baseaha jeon sak 16 ong•gen.
Meghalaya-ni sak 12 player-rangra Nisilia Majaw, Iawanlang Nongbet, Rivilda Rynjah, Philawansha Mylliemngap, Badarisha Kharumnuid, Banrilang Lyngdoh Nongbri, Aidashisha Shadap, Aibaplielad Skhemiew, Rushia Dkhar, Sunalinda Iawren, Phidarilin Swer aro Betsheba Kharsyntiew ong•achim.