AITC General Secretary-ni Shillong-o agananggipa kattako Baghmara aro Chokpot-ni manderang jegala
Baghmara, July 8, 2022:Ja•manchake kobor man•soani gitade, mnisal Budbar salo Baghmara aro Chokpot jolni manderang, re•anggipa June 29 tariko All India Trinamool Congress (AITC)-ni National General Secretary Abhishek Banerjee Shillong songjinmaona re•bae, AITC-ni tom•bimonganio “Meghalayan Virus” ine agananggipa kattako jegale namnikgijaniko mesokna jinma re•jomangaha.
Ua a•paloni re•bae Meghalaya-ni manderangko ‘Virus’ ine aganaha, “Chinga virus ong•ja” ine jegalataha. “Garo-de, Garochi saaon ka•gen, Khasi-de,Khasi-chi sason ka•gen, Jaintia-de Jaintia-chi sason ka•gen ine agananiara, chingni Meghalaya a•doko jatgittam apsan ku•mong nangrime janggi tanganiko ma•ekate agananiara namen gisiko sa•dikatani ong•a. Chinga da•odipet Meghalaya a•doko jatgittam ku•mong nangrime aro tom•tome janggi tangenga” ine jegalgipa dolrang janapataha.
Abhishek Banerjee-ni indakgipa kattarangko chinga Baghmara aro Chokpot jolni manderang raken jegala aro Meghalaya a•doko jatgittam meli nangrime donganiko ma•ekatna agananiara ra•chakna man•gijani ong•a ineba janapataha.
Uandakgipa Abhishek Banerjee-ni kattara a•doko songdongenggipa manderangni gisiko tom•tom dongako kajia ong•atna miksongani ong•a ine matnangataha.