Resubelpara, June 10, 2022:North Garo Hills a•jani Bakrime Area Level Federation, Daram areani Womens’ Group Sukrobar salo Environment Awareness Program-ko Daram Union Secondary Skulo ong•atenba bolrangko ge•angaha ine koborna u•iataha.
Ia environment awareness program-ko ong•atanio Rongrong elakkani MDC Rinaldo K.Sangma mongsonggipa sokgipa ong•e bakko ra•angaha.
Indake ia program-ko ong•atanio Daram Union Secondary Skulni bang•a chatro chatrirang bakko ra•e, rongtalanirangko dakenba North Garo Hills a•jako tangsimbitbit ong•atna bang•a bolrangko ge•angtokaha ineba u•iataha.
A•jao environment-ko name ripingangna aro namgipa climate-ko ong•atna iandakgipa program-rango pilakan bakko ra•china Rinaldo Sangma chatro chatrirangko didiangaha.
“Adita salna skang mangmang a•gilsak gimiko World Environment Day (WED)-ko maniangengon, Garo Hills-ni dingtang dingtang biaprango WED-ko manie bolrangko ge•angtokaha. Garo Hills-o bol wa•arang aro buring bolgrimrang komirikrikangani a•sel agrepile ding•anirang batroroenga, uni gimin uandakgipa ding•aniko komiatna aro namgipa environment-ko ong•atna sakantian gisiko nange bolrangko ge•na nangchongmota ine Rinaldo Sangma agan ku•pattiangaha.