Skanggipa changna Dadenggre Sub Division-ko district songna tom•e chanchirimaniko ong•atenga
Tura, June 10, 2022: West Garo Hills a•jao donggipa ge•sa gitchambatgipa Dadenggre Sub Division-ko district-ona ra•doe on•china skangonin GSU WZ, Dadenggre dabiengon, da•o skanggipa changna Dadenggre Circuit House-o tom•e chanchirimaniko ong•atenga. Ian kakketgipa kam ong•ode, A•chik a•songni namgni ong•gen ine GSU-WZ, Dadenggre parakataha.
“Oe beben je tom•aniona okamniara namgipa chanchiani ong•chongmota, Dadenggre Sub Division-ko chu•gimik district-ona ra•dona nangchongmotenga” ine GSU parakataha.
“Chinga songtangna namgipa ja•ku de•aniko ra•bagenchimode, chanchisoani aro niksamsoaniko dedrang su•drangna chasongni chasongna namdapataniko man•pagnok” ine gisiko kusi ong•a.
Indiba baditana kakket ong•gen. An•ching pilakan ma•sia, 1982 bilsini August 17 tariko Dadenggre Sub Division-ko songaha aro Sub Division-ko songani ja•mano bilsi 40 mang batpile janggi tangbaengjok. 1982 bilsio Sub Division-ko on•ahaoba kamrang ka•sokja aro manderangni nanganirang salsa bate bate bang•rorobaaha. Uarang gimiko chu•sokatna gita Dadenggre Sub Division-ko district songchina skanggipa 1999 bilsio dabina a•bachengaha. Indita bilsi dabitaitaiengon, sorkari maming dakeba knachakja aro aganchaka dongja. Indiba da•o skanggipa changna district-ona ra•doani gimin tom•aniko ong•atna dingtang dingtang Dadenggre jolni SDO, BDO-rang, NGO-rang aro songni manderangko okamatenga. Ian Sub Division-ko chu•gimik District-ona ra•dogenchimode, manderangni janggi tangani bewalrang tang•dona gita man•gen. Maina dingtang dingtang office-rang, dingtang dingtang chona dal•a department-rangba sokbagnok, unode songo kam gri ong•e dongenggiparang bang•an chona dal•a kamrang jekai peon, chowkodar ba dingtang dingtang kamrangko janggi tangpana man•gen. Indiba songo dongkamgipa mandenasa kamrangko on•na aro man•na nanggen. Uni gimin songtangni mandenasa skanggipa cholko on•na nangchongmotgen. Ia District-ko ra•banio, dingtangmancha dabianiko knachakchongmotna nanggen ine District Administration aro a•dok sirkariko GSU gisik ra•atangaha.
Songtangni District Selection dongahaode, songtangni manderangna bang•bate cholrangko on•chengna nanggen. Gipin dingtang dingtang district-rango a•jatangna sanale kamna dakgrikanio songtangni mandena skanggipa cholko on•chenga.
Uni gimin, “jerangan Chairman, Secretary aro member-rang ong•gen, da•onian mikkrake an•chingni mipalko ra•sekna on•jawa, hai an•ching mipaltangna sanalna. Songtang noktangna dingtangmancha ka•saani aro sanalani dongna nanggen. Chinga songtangna nangnikaniko ra•bana kam ka•engon, ong•gija dakako ba namgija dakako jrip nie dongjawa raken kamrangko ka•angkugen. Uandake chingni dabina nanggiparang bang•a, chinga pilakon nipiltaie ja•kuranggko de•anggen” ine GSU WZ, Dadenggre-ni President Tengsan M Marak parakataha.