Tura, May 13, 2022: West Garo Hills a•jani Forest Department, Damalgre songo an•cheng bikotaniko dontongatanina Tura-ni BJP MDC Bernard N. Marak raken jegalata.
Nokma A•khingni ning•o donggipa biaprango Department-ni manderang maming dakeba raiko on•na man•ja ine ua janapataha.
“Garo Hills a•jao A•kingko Nokma-rangsa nirok simsaka. Uandake A•kingni ning•o donggipa pilak a•arang, chiring chibisikrang, bol wa•arang aro an•chengrangko nirok simsakani Nokma-ni jakosa ong•a. A•brini a•arangko a•songni niam gita ma•eke dingtangmancha Sixth Schedule-o napate niamrangko tarie on•aha. Uandake a•arangko nirokgipa aro simsakgipa Nokmarangsa ong•a, A•kingni a•arangko ja•ku de•e rai on•na Department-ni maming bil dongja. A•dok sorkari aro Garo Hills Autonomous District Council (GHADC)-ni manderang A•king Nokmani ning•o donggipa biaprango maming dakeba an•tangari raiko dakna man•ja. Uandake a•dokni Forest Department, Court-ni on•gimin rai donga ine an•cheng bikotaniko dontongataniara niamni kosako ong•a. A•khingni ning•o donggipa manderang skang chengonin da•alona kingkingba dakrongbaenggipa niamko ja•rikesa an•chengko bikotenga, uamang da•ona kingkingba an•chengko maming machine gri chimongchengesa koko olenga. Uandake chimonggimin an•chengrangko rama a•samo donako garirango salronga. Indake an•cheng bikotanichi ma•manti sambolrangna aro chiring chibisikrangna maming neng•nikaniko ra•baja. Indide State Forest Department-ni manderangara, maikai Nokma A•kingni ning•o an•cheng bikotna man•jawa ine raiko on•aha. Ian niamni kosako ong•chongmota. A•kingni ning•o donggipa a•arangko Nokmarangsa nirok simsaka, uasa pilak kamko niroke raiko on•na bil donga” ine janapataha.