Tura, May 13, 2022: District Level Inter Skul Athletics Meet-ko West Garo Hills a•jani Tura sepango donggipa Ballonggre Field-o salgnina joljol ong•atangaha.
Ia kal•susaanio a•jani dingtang dingtang skulo poraienggipa bi•sarang bakko ra•angtokaha.
Ia Athletics Meet-ko bilsignina dontongani ja•mansa, WGH a•jani District Sports Officer, Khelo India 2022, Azadi Ka Amrit Mahotsav aro bilsi 50 Meghalaya a•dokko man•chengani bak gita ong•atangaha.
Indake Athletic Meet-ni skanggipa salo West Garo Hills a•jani Deputy Commissioner Ram Singh mongsonggipa sokgipa ong•e bakko ra•angaha aro bon•kamgipa salo Shillong songjinmani Directorate of Youths and Social Welfare-ni gitcham Assistant Director Jasper P. Marak mongsonggipa ong•e bakko ra•angskaha.
Ia kal•susaani bon•kamgipa salo, JP. Marak kal•susaanio chegipa chadamberangna aro bakko ra•gipa chadamberangna nama sikaniko on•angaha.
“Kal•susaanio chu•sokanide altugipa aro nengragipa ong•ja, anga bebe ra•a ia kal•susaanio cheanggipa sakantian kramchi ong•katgale jotton ka•ani bitesa ong•a” ine ua aganangaha. Ua sorkarikoba Covid 19-ni restriction-rangko ra•gale tom•aniko ra•galna man•anina demittelle aganangaha.
Unbaksana WGH a•jani District Sports Officer (DSO) Saljagring M Marak, ia atheletic meet-o bang•a field event-rangko ong•atangaha aro uarangko bilsi 14, 16 aro 18 category-ni ning•o me•a aro me•chikrangna bak ka•e sualangaha. Indake ia kal•susaanio Montfort Secondary Skul, Dilnegre Skul aro Bolchugre skul gimik kal•susaanio che•gopangaha ineba ua parakataha.
Apsandake, WGH a•jani Senior Medical Officer, Dr Roger Marak, ma•a paarang, DSO-ni ka•rimskarang aro wilwilao donggipa bang•a chadamberang bakko ra•angtokaha ineba u•iataha.