Tura, 16 Jan 2022: Jinmani namgnina a•dokni CM niamrangko ja•rikchina ge•etenba an•tangni raiko gualpile Tura Police Parade Ground-o maming neng•nika gri Cricket tournament ba kal•susaanirangko ong•ataha. Mande jinma tom•ao aro mela-o Corona sabisi giprorona namen altugipa ong•a ine adokni Skotong Pa Conrad Sangma salsao aganachim indiba ua ku•patiani aro didiani indin ongramaiaha. Sal wal ong•atgipa Cricket tournament-ona re•anggipa manderang sak 500 bate susa•aniko ninagita sokangtokaha. Social activist-rang aro dingtang dingtang dolni manderang ia tournament-o niamko pe•e mask gangija sepange chapchap roaniko nike suk ong•gijaniko parakataha. Mikkang nigija a•dokni gimik programrangko a•bachengtaiatnade COVID sabisini komiangkalo sengtokna nanggen.
Re•anggipa antini channanio Megahalaya adoko rang•gitik sak 160 COVID sabisiko man•naha, uni gisepo aro sal 15-na bate kal•susaangkuode ua a•damo susa•aniko nina re•anggipa pilak manderangna kenchakani ong•a aro simsake mikgrakataniko on•na nangchongmota. Pa Conrad Sangmani dongimin niamrangko namrenge dal•e ra•gijanira jinmana bang•a neng•nikanirangko sokata gita onggen. Mingsongbate da•ororo kenbegnigipa sabisiko sanna banna gita Meghalaya a•doko (health care system aro health infrastructure) da•onaba chu•ongagita bosturang dongkuja.
Chief Minister-ni simsakgijaniko mesokaniara changsasan ong•ja indiba bang•a changon dongimin niamrangko pe•e a•dokni manderangko kalake roa gita chacha ong•a ine Garo Hills-ni dingtang dingtang dolni manderang CM-ko matnange aganaha. Koborrangko man•soanigita re•anggipa antioba COVID niamrangko ja•rikgija Rajabala Constituencyni ning•o donggipa Batabari songni NPP-ni gitalgipa membor Abdus Saleh-ko grongna re•angon mande bang•e tom•bimonganiko niknagita man•aha.
“A•dokni skotong Pa Conrad Sangma, January-ni 21 tariko Meghalaya a•dokni bilsi 50 gapaniko manina gita rimchaksoaniko nike, mania-ona re•ange tom•dakaniara “super spreader” ba “sabisiko ta•rakbate gipatnagipa” ong•a. Meghalaya a•doko COVID ba Omnicron sabiok ta•rake batroroengon, jinmana chanchigija tom•dakaniara medical departmentni dongimin niam aro an•tangni ge•etgimin raiko pe•a gita ong•a” ine Raiot-ni editor, activist aro film maker Tarun Bhartia re•anggipa antio CM-ko matnange aganaha.