Bilsi 50-ni gisepo Meghalaya a•dokni dingtanganiko Dr. Milton nipiltae agana

0

Re•baenggipa January 21 tariko Meghalaya a•dokni bilsi 50 gapaniko manina a•dok sorkari tarisoengon, Tura songjimao songdong a•chachenggiparangoni saksa senior ong•gipa, niksenggipa aro Tura NEHU Campus-ni gitcham Vice Chancellor Dr Milton S.Sangma, Meghalaya a•dokko man•na dakgrikdilgiparang an•tangtangko on•kange krengdilanichi Meghalaya a•dokko man•dile on•angahani gimin demittele aganaha.
Ua chasongo bang•a dingtang dingtang neng•nikanirangko man•genchimoba Meghalaya a•dokna dakgrikdilgiparang dontonggija gisiko nangbee kingkot neng•bee kam ka•anichi Meghalaya A•dokko man•ahachim.
Dr Milton Sangma-ni agana gitade, Meghalaya a•dokko man•na skang Meghalaya a•dok bilsi 25-na Assam a•dokni ning•osa ong•achim. Ua somoio Meghalaya a•dokni manderang namen onchepako man•ani gimin namen neng•nikaniko man•aha.Ua somoio Assam sorkari Assam a•doko Assamese Ku•sikko Official Language dake ra•gatna Assembly-o bill pass ka•ani a•sel Meghalaya-o songdonggipa manderang chong•motan Garo, Jaintia aro Khasi jatgittamni dilgiparang Meghalaya a•dokko man•na gita dakgrikina draatako man•aha.
Indake jatgittamni dilgiparang dolsa All People Hill Leadership Conference (APHLC) political dolko bikote, Captain Williamson A.Sangma-ko President songe, Meghalaya a•dokna dakgrikaniko a•bachengdilaha, uamang dontonggija ding•ol gramchi ong•e, gisik taning neng•e kingkot dakgrikdilani ja•mano India a•songni gitcham Prime Minister, Ma Indira Gandhi 1972 bilsio chu•gimik Meghalaya a•dokko on•aha. Uni ja•mano Meghalaya a•dok Assam-oni ma•ekako man•aha. Ua somoirango re•a doani rama jal•angrang namen namjachim, a•dimurarako re•na nanga aro ja•achi re•ode Guwahati-oni Tura-ona salgni nangachim. Indiba da•alo Meghalaya a•dokko man•chengaoni niatgenchimode, ramarang namen nambejok sorokrang blacktopping sorokrarasajok.
Battanggimin ua sal somoirangko nipilatgenchimode, Meghalaya a•dok bilsi 50-ni gisepo namen dingtanganiko nikna man•aha, re•a doani rama jal•angrang, poraiani skul aro kolege-rang, dokdor-rang, nurse-rang, sanna banani hospital-rang, dal•dalgipa Officer-rang namen bang•bejok. Indiba mingsako aganna sika, India a•songni dingtang dingtang a•dokrang, Meghalaya a•dokna bate gadang 10 bata. Meghalaya a•dok kangal ong•batsranggipa a•dokrangoni ge•sa ong•a, skia poraianio namen komibatsranggipa aro namroro silroroanirango namen ja•manchakkuenga. India a•songni gimik a•dokrangnan apsandake India Sorkari namroro silroroaniko tang•doatchina tangka paisarangko on•atenga, indide Meghalaya a•dokara maina ja•manchakskaenga, iarangko nike anga suk ong•ja ine Dr Sangma kobor ra•timgiparangna aganaha.
Meghalaya a•dokko mai miksonganio gitcham dilgiparang man•dile on•angachim, Indiani salgro salaram a•dokrango songdongenggipa a•brini jatrang an•tangtangni dakbewal rikbewalrang, cha•bewal ringbewalrang, tua bamanirang, niam rettirang aro jatni culture ba identity-ko gimaatgija name ripingna man•na gita a•doktangna namroro silroroanirangko ra•bana miksonganiosa Meghalaya a•dokko man•na dakgrikdilangaha. Uni gimin da•o Meghalaya a•dokni gital dilgiparang namedake chanchiesa Meghalaya a•dokko mikkangchi nambate ripingangna nanga ine Dr Sangma didiangaha.
Meghalaya a•dok da•alo ba ia jao bilsi 50 gapaniko maniengon, Meghalaya a•doko songdongenggipa sakantina namen katchabeani aro kusi ong•beani ong•a. Meghalaya a•dok Assam-ni ning•o ong•kugenchimode, mai ong•enggenchim, indiba dilgiparang uarang gimiko niksamsoa gnangsa Meghalaya a•dokna krengdilangaha, an•ching uamangko mittelna krachong•mota. Uamang baditan duk chake cha•na ringna man•pilgija neng•skime dakgrikani ja•mano Meghalaya a•dokko man•dile on•angaha, uarangko niatode namen dukni ong•a.
Uni gimin uarangko gisik ra•e, Meghalaya a•dokko dilgiparang apsan ku•monge jat aro a•songni namgnina nisan donne ka•sagrikao pilak neng•nikanirangko nirok simsakgrike Meghalaya a•doko songdongenggipa manderangni pilak kamrango janggi tangani gadangko nambatatna aro namroro silroroatna kakket aro bebeo dilgipa ong•e kamko ka•na nanga ine Dr Milton Sangma agan ku•pattiataha.
Mingsako gisik ra•atengon, Meghalaya a•dokna dakgrikani somoio Assam-ni A•chikrangba apsan ku•monge, pilak kamrango, on•gilanirango chel•begipa biaprangoni re•bae dakchakpaaha. Indiba jensalo Meghalaya a•dokko man•aha, uamangko watchange donangana nangaha. Iani bidingo Assam-o dongrikgipa A•chikrangko Meghalaya-o chapatchina Assam sorkario mol•molahachim, indiba Assam-ni a•ako inch-saba Meghalaya-o chapatna man•jawa ine Assam sorkari aganchakaniko knaon Dr. Milton gisiko suk ong•gijaniko parakaha.

 

Leave A Reply

Your email address will not be published.