NGO-rang Wageasi PHC-o ta•rake dokdor ra•bachina mol•mola

0

Resubelpara, May 27, 2022: North Garo Hills a•jani ning•o donggipa Wageasi Primary Health Centre (PHC) jekon Bakdil NGO chalaiengachim, uano Dokdor, dongjani gimin May 27 tariko Dainadubi-ni nanggrimgimin NGO-rang Wageasi PHC-ni Skotong Bakdil-ni Sister-ko grongeha.

Maina sagipa ding•gipa manderangko sana bananio dokdor dongjani a•sel bang•a neng•nikaniko man•enga. Uni gimin, manderangni badi ka•anio pangchake Dainadubi-ni NGO-rang jakai Garo State Movement Committee (GSMC) Dainadubi Regional Unit, All A.chik Youth Federation (AAYF) Dainadubi Regional Unit,
Public Join Action Committee (PJAC) aro Dainadubi jolni Dilgiparang, Wageasi PHC-ni Skotong Sister-ko grongenba ta•rake Dokdor-ko ra•bachina didiangaha.

Jedakode sana bananio neng•nikani gri dakchakaniko man•gen golpogrikangaha. Indake Wageasi PHC-ni skotong NGO-rangni mol•molaniko knachake ka•donganiko aganataha.
“Chinga June 1 tarikon Dokdor-ko ra•bana joton ka•gen” ine Sister ku•rachakataha.

Indake Wageasi PHC-o donge Sana Bananiko man•enggipa manderang maidakode dakchakaniko man•gen uarangko agan janapangaha.
“Chinga mikkangchi sagipa manderangko bil amadipet name simsak nirokaniko dakanggen” ineba Sister ku•rachakataha.

Indake ong•engon, NGO dilgiparang mikangchi nambate Sana Bananiko on•china didiangengon, Wageasi PHC-o donggipa Ambulance-ko jakkalani bidingoba agan janapangjolaha. Unbaksana, sagipa mamderangko Wageasi PHC-oni gipin biapchi ra•angengachim, uamangna obostani kri dakchakaniko on•pachina Skotong Sister-ko mol•molangaha.
Uarangkoba chinga obostani kri nigrike dakchakaniko on•gen ine ku•rachakataha.

Leave A Reply

Your email address will not be published.