Baghmara, Jan 26, 2023: South Garo Hills a•jani Chokpot jolo songdongengipa manderangni koborko man•soe, Chokpot jolni nangrimgimin NGO-rang FKJGP, AHAM, AYWO, GSMC aro songni manderang Budugre A•kingni Dareng chibisikoniko ro•ong bikotenggipa biapona re•ange sing•sandianiko dakangaha.
NGO-rangni janapatani gitade, Dareng chibima rona biap an•senggipa aro ka•singipa buring bolgrimrangko cho•prue Dareng chibimona sorok tarianiko nike NGO-rang raken jegalataha.
NGO-rang Chokpot jolo songdongengipa manderangni neng•nikgniko talate, iandakgipa kamko ka•jachina mikkrakataniko on•angaha.
Dareng Chibima Chokpot jolo dilsa dal•batgipa chibima ong•a. Nokrek aro Miminram a•brioni jokbae, Chokpot Warimao nitogipa Wariko ong•ate, Chokpot Civil Sub Division-ko jokange Bangladesh-ona jokangipa chibima ong•a. Ia chibimako Chokpot jolrango songdongengipa songrang, jekai Chokpotgre, Bibragre, Dagalgre, Rampragre, Bamongre, Mikdapgre, Silkigre, Chambilgre Sibbari aro bang•a songni manderang ia chibimako jakalengachim ineba parakataha.
Uni gimin ia Dareng chibimaoniko ro•ong bikote, chibimako nosto ka•an baksa jabol ong•atgen aro chibima tipchangode, songdongengipa manderangna namen neng•nikaniko ra•bagen ine NGO-rang parakataha.
Uni gisepon Chokpot jolo songdongengipa manderangni champenganiko manijaode, dingtang ja•kuko de•na draatako man•gen ineba parakataha.
“Chinga pilak songko nokko dilenggipa ma•a paarang, Nokma Sordar-rang a•doktang chigatangko name nirok simsake chiring chisikrangko tangkame rakkina aro mikangchina chanchisamsogipa ong•na” ine NGO-rang parakatan baksa ku•monganiko on•ataha.