Williamnagar, Jan 27, 2023:Rongjeng elakkani gitcham MLA ong•gipa Disang M.Sangma, Meghalaya Legislative Assembly-ni warachakgipa aro TMC dilgipa Dr Mukul Sangma, TMC State General Secretary Mukul Das aro Rongjeng-ni TMC candidate Sengnam M.Marak, Williamnagar TMC candidate Alphonsush R.Marak aro Samanda-ni MDC Lahitson M.Sangma-ni dongpanio Meghalaya TMC-o napangaha.
Rongjeng-ni gitcham MLA Disang Sangma-ko Dr Mukul Sangma aro gipin TMC dilgiparang kusi ong•bee, Butbar salo TMC nokdangona rimchaksoaha.
Desang M Sangma saksa gitcham political dilgipa ong•e, changgnina joljol Rongjeng elakkao MLA cheaha. Ua political a•bao donge manderangna dangdike on•na gita 2006 bilsio NCP-ni membor ong•e, kamko ka•ani ja•mano apsan bilsio Assembly by-election-o Assembly bye-electiono susae cheaha. Indake 2008 bilsini Assembly election-o NCP party ticketoni susae chetaiaha.
Uandake joltangni manderangna dangdike on•engon, Disang Sangma jat aro a•songna dangdike on•angkuna miksonge, mikkangchi TMC baksa bakrime kamrangko ka•angkuna TMC dolo napaha ine parakataha.