Tura, May 16, 2022: Khasi Hills a•jani dolsa NGO, Joint Action Cimmittee Border Of Meghalaya (JACBOM) aro Garo Hills-ni dingtang dingtang NGO-rang jekai GSU, ADE, FKJGP, AYWO, FAF, NTDF, TGSCF aro gipin Social Organisation-rang baksa ku•monge Sombar salo West Khasi Hills a•jao donggipa Mallang Siminaguri kal•chakram biapo dal•begipa tom•bimonganiko ong•atangaha.
Ia tom•bimonganiko ong•atani miksongara, re•anggipa March 29 tariko Meghalaya aro Assam-ni skotong minister sakgni Union Home Minister-ni mikkango Memorandum of Understanding (MoU)-o soi ka•e, Assam aro Meghalaya a•dokni sima ario donggipa Meghalaya-ni adita A•chik songrangko Assam-chi chapatani gimin, Skotong Minister Conrad Sangma-ni kamko jegale mikkangchi rakgipa ja•kurangko de•angna tom•e chanchirimaniko dakangaha.
Skotong Minister Conrad Sangma, a•dok chigako nirok simsakgipa songni Sordarship, Himaship, Shyiemship aro District Council baksa chanchirimgija, sani a•dok chigani ning•o ga•akachim ukoba sandichenggija, an•tangni sika gita MoU-o soi ka•e skangoni Meghalaya a•doko song a•chabaenggipa adita A•chik songrangko Assam-chi pakwatataha.
Uni a•sel sima ario songdonggipa A•chikrang jekai Mallangkona, Maikhuli, Langpih aro gipin songni manderang duk michi ong•e, Meghalaya-ko wate Assam-chi re•angjawa ine jegalaniko dakenba NGO-rangni dakchakaniko bi•e mol•molahani gimin Khasi Hills aro Garo Hills-ni NGO-rang apsan nangrime, ia sima arini bidingo dakgrikna a•bachengataha.
NGO-rangni parakanga gitade, inchisaba Meghalaya-ni a•ako Assam-na on•jawa, Meghalaya a•dokko man•chengaoni da•alona Meghalaya a•doko songdonge, Meghalaya-ni pilak man•gnirangko man•pae, Meghalaya a•dokni eleksin id-card-rangko man•ne, Meghalaya a•dokon lekka pu•ongipa manderang ong•achim. Indiba da•alo Conrad Sangma-sa Meghalaya a•dokko pale cha•enga ine NGO-rang jaksi otaha.
Indake Sombar salo tom•e chanchirimani gitade, JACBOM ia a•selni bidingo chubatgipa gadangni Katchari-ona ba Supreme Court-ona ra•anggen ine parakataha. Indiba Garo Hills-ni NGO-rang, Khasi Hills-ni NGO-rang baksa apsan chanchirimaniko dakenba dingtang ja•ku de•aniko dakangsksagen ine ADE Apex Committee-ni President Dalseng Bira Ch.Momin parakataha.
Indake GH-ni NGO-rang Mallangkona-o tom•a matchotani bakan KH-ni NGO-rang baksa tom•e chanchirimna gita Shillong songjinmaona re•angenga ineba u•iataha.