Skotong Minister Skill Hunar Hub-ko rikna pangchakani ro•ongko songe on•anga
Tura, May 16, 2022: Meghalaya a•dokni Skotong Minister Conrad Sangma, Pradhan Mantri Jan Vikas Karyakram-ni ning•o PA Sangma Medical Skill Hunar Hub-ko rikna pangchakani ro•ongko May 14 tarik Sonibar salo Rongram C&RD Block-ni ning•o donggipa Dumindikgre songo songe on•angaha.
Ia pangchakani ro•ongko songe on•ani somoio Skotong Minister-ni agan-ku•pattimgipa (Adviser) Thomas A Sangma, Family and Health Welfare-ni Minister James K Sangma, NPP-ni National Secretary Dr. Rajiv Jaiswal, WGH a•jani Deputy Commissioner Ram Singh, Nokmarang aro bang•a Officer-rang bakko ra•angtokaha.
Indake ia tom•anio Conrad Sangma jinmana aganprakengon, “Ia Skill-Hub-ara tangka gong 151.9 kror-ni project ong•a aro ian India a•songo dal•batsranggipa Medical Hub-ba ong•gen. Ia Medical Hub-ko rikna gita Dumindikgre songni Nokma aro Maharirang jaksrambee a•arangko on•aha. Ia project-ni ning•o pallang ge 300 Multi Speciality Hospital, Pharmaceutical Kolege, Para-Medical Kolege, Skill Developmental Centre donggen aro iano pallang ge 100 nursing hostel, pallang ge 100 para-medical hostel, pallang ge 500 me•asarangni hostel, pallang ge 200 me•chikrangni hostel, kam ka•gipa me•chikrangni hostel donggen aro iana Social Welfare Department-ni gita Ministry of Social Affairs tangka chamataha aro matchotmanani ja•mano Health Department-na pakwate on•gen. Anga North Tura-ni MLA Thomas Sangma-koba indakgipa nama kamrangko songna ra•bae on•anina mittelna ku•si ong•a” ine aganangaha.
Health and Family Welfare Department-ni Minister James K Sangma-ba dongpae, “Anga Minority Affairs-ni Union Minister Mukhtar Abbas Naqvi-ko ia project-na tangkarangko chamatanina aro songni Nokma aro Maharirangni ka•sae a•arangko on•anina mittelna sika. Ia Medical Hub, Meghalaya a•doknasan ong•aigija wilwilao donggipa pilak a•dokrangnaba bang•a namgniko ra•bagen” ine aganangskaha.
Unbaksana North Tura-ni MLA, Thomas Sangma-ba jinmana aganprakengon, Dumindikgre songni Nokma aro Maharirangni ia Medical Hub-na ka•sabee a•a bigha 98-ko onanina mittelangaha.
Indake ia tom•anio DC Ram Singh rimchaksoani kattarangko aganangaha aro Social Welfare Department-ni Director D D Shira mittelpilani kattarangko aganangskaha.