Baghmara, July 7, 2022: South Garo Hills-ni NGO-rang jekai GSU Gasuapara Regional Unit, GSU Kapasipara Unit, FKJGP Sibbari Circle, ADE Gasuapara Regional Unit, ma•gipa dolrang aro jolni manderang apsan namgrime, Gasuapara-o PHC-ko on•china Bristibar salo Gusuapara health sub centre mikkango asonge jingjengatangaha.
NGO-rangni parakatani gitade, ru•uta bilairangonin Gasuapara PHC-ko on•china, a•dok sorkarina, health and family welfare-ni minister-na, South Garo Hills-ni Deputy Commissioner-na, Medical Health Officer-rangna lekkarangko sedoate dabianiko dakahachim. Indiba da•alona kingkingba maming aganchakaniko on•jaengani gimin, Bristibar sal dipet jingjengataniko a•bachengataha.
Gasuapara jolo songdongenggipa manderang Gasuapara Sub Centre-o bang•a neng•nikanirangko chagrongna nangenggipara, mongsongbate bi•sa atchigipa ma•giparangko sanna banna aro birth certificate-rangko tarina namen neng•nikani ong•enga ine janapataha.
“Chinga Gasuapara-o thana-kode man•jok, indiba da•o PHC-ko nangenga, maina jolni kangal cholgri manderang chel•a hospital-rangchi sagiparangko ra•ange sanna banna man•pajani gimin, songtang Gasuapara-o PHC-ko on•china a•dok sorkariko mol•molatna nangnika” ine ma•gipa dolrang aro NGO-rang janapataha.
NGO-rangni u•iatani gitade, Gasuapara PHC-ko rikna gita songni Nokmarang a•ako on•manaha, indiba a•dok sorkari da•alona kingkingba dabianiko knachakkuja. Uni gimin, jolo songdongenggipa manderangni namgnina chanchie, Gasuapara PHC-ko ta•rake on•pachina NGO-rang a•dok sorkariko mol•molatenba, a•dok sorkari manderangni neng•nikaniko naljokatna dabianiko chu•sokatgen ineba ka•donganiko parakataha.