Dudhnoi pulisrang me•chik saksako kragija dokani gimin NGO-rang jegale jinma re•joma
Resubelpara, July 7, 2022: Re•anggipa July 4 tariko Dudhnoi Pulis Station-ni Pulisrang aro koila badinggipa Dhrubananda Choudhory Dainadubi-ni me•chik saksako kragija dokpetpete saknaatani gimin Dainadubi jolni NGO-rang GSU, AHAM, Mothers’ Union, Public Action Committee (PAC), GSMC aro skul chatro chatrirang dos dakgipa pulisrangko rim•e sasti on•china dabie Bristibar salo jinma re•jome jegalgrimangaha.
Dos dakgipa Dudhnoi Pulis Station-ni pulisrang aro Dhrubananda Choudhory-ko rim•e, niam gita sasti on•na baksa uamangni kamko bon•atna nanga aro saknaako man•enggipa me•chikna kakket bichalko ra•bana nanga ine NGO-rang dabiangaha.
Ia a•selara Dhrubananda Choudhory-ni tol•e badi ka•ani giminsa ong•achim, ua re•anggipa 2021 bilsini February 24 tariko Sengkal K.Sangma-na tang gong hajal 95-ko on•ate, Dainadubi Dangkong-o chimonge donenggipa koilako sruk sruk ton 29 ba 30 salange on•china aganahachim. Indiba Sengkal Sangma uni agana gita koila salange on•jahani gimin, Dhrubananda June 25 tariko Sengkal Sangma-ni kosako badi ka•aha ine Sengkal Sangma-ni jikgipa Mousmi Momin Goalpara SP-na badi ka•gipa lekkao janapataha.
Indake July 4 tariko Sengkal Sangma-ko Dudhnoi Pulis Station-ona okamatani gimin uamang jiksesa thana-ona re•angaha. Uamang jiksesa thana-ona sokangon, Dhrubananda pulisrang baksa dongsoe uamang jiksesako dagrange ka•mikkenataha aro seltagija kattangko aganne, dokna a•bachengaha. Unbaksana tangka lak 20-ko on•china dabidraaha. Indake uamang jiksesako ka•saninggija dokani ja•mano, Sengkal Sangma-ko tangka gong lak 20-ko sandie ra•bachina watatenba, jikgipako thana-o chipchange kragija doke sate roaha aro bilongen saknaako man•aha.
Uandakgipa Dudhnoi pulisrangni namgijagipa kamko NGO-rang jegale, dos dakgipa Dudhnoi Pulis Station-ni SI Bishnu Newar, me•chik pulis Mamta Joshi aro gipinrangko rim•e niam gita sasti on•china aro uamangni kamko bon•atchina raken dabiangaha.
NGO-rangni janapatani gitade, dos dakgipa pulisrangko da•onaba rim•e uamangko sasti on•kuja, uni gimin uamangko ta•rake rim•na nangchongmota aro dukko man•enggipa me•chikna kakket bichalko on•na nanga ine NGO-rang dabiangaha.