Resubelpara, April 10, 2022: North Garo Hills a•jani ning•o donggipa Dainadubi jolni Chima A•pal Self Help Group (SHG)-ni Teng•sue VO salsani ba One Day Awareness Program-ko Sukrobar salo Chima A•pal Community Hall-o ong•atangaha.Ia program-ko ong•atani miksongara, seng•gnang bia ka•ani ba jikgipa-segipa ra•ani(Early Marriage)-ni bidingo skie on•na gita Chima A•pal Teng•sue VO-ni President Ma Mailina K.Sangma Secretary Ma Noara Momin gisiko nangbee chandamberangni bilsi chu•onggija segipa-jikgipa ra•e, bang•a chadamberang an•tangtangni poraianiko bon•chongdikatenga aro nokdango janggi tanganio bang•a neng•nikaniko man•engani gimin chadamberangna agan-ku•pattie on•angaha.
Ia One Day Awareness program-ko ong•atna gita North Garo Hills-ni District Administratiion (DA) tangka paisachi dakchakaniko on•ahani gimin, “Chima A•pal Teng•sue VO-ni dilgiparang dingtangmancha, District Administration-ko mittelna sika, maina DA gisiko nangbee chingna indakgipa program-ko ong•atna gita tangka paisarangko dakchakataha” ine Ma Mailina K Sangma mittelpilskaani kattarangko aganangaha.
Ia program-ona re•bae skie ra•anichi bang•a chadamberang mikkangchi seng•gnang jikgipa-segipa ra•anio simsake janggi tangchina ICDS-ni Superviser Ma Susan R.Marak, DA-ni Ma Tadingchi Sangma, Dainadubi PHC-ni Dr. A.M.Sangma mongsonggipa sokgiparang ong•e mikkangchi chadamberangni janggi tangani gimin agan ku•pattie on•angaha.
Unbaksana chadamberang mikkangchi diingtang dingtang cholrangko dake janggi tangani giminba agantalate on•angjolaha.
“Chinga mikkangchiiba dingtang dingtang Awareness program-rangko ong•atangkugen” ine Chima A•pal Teng•sue VO-ni President agandapangaha.