Resubelpara, March 24, 2022:Re•anggipa March 22 tarik Monggolbar salo North Garo Hills a•jani Additional Deputy Commissioner, Zenithsky J.Sangma, Dainadubi-o gital C&RD block-ko dabiengani gimin gital block-ko rikna gita biapko niangaha ine u•iataha.
North Garo Hills a•jani ning•o donggipa Dainadubi aro uni wilwilao donggipa songni mamderang Resubelpara aro Kharkutta ge•gni C&RD block-rangchi chel•begipa ramako koros bon•ne aro neng•bee re•angna nangani a•sel neng•nikaniko man•enganj gimin, Dainadubi jolni manderang apsan chanchirimaniko dakenba gital block-ko dabina miksongaha aro indaken re•anggipa 2016 bilsioni gital block-ko dabina re•chakataha aro 2018 bilsini December 31 tariko a•dokni Skotong Minister Conrad Sangma-na memorandum-ko on•manahachim.
Indiba da•alona kingking ua kamrang be•en pil•na man•kujaengani gimin adita salrang skang Dainadubi-o jinma re•jome dabianiko dakangtaiaha.Indake ong•engon, Resubelpara block-ko ra•jitangna re•anggipa March 15 tariko North Garo Hills a•jani pialk Nokmarang, Sordar-rang, songni manderang, Mondolini dilgiparang aro songko nokko re•dilgiparang baksa District Administration tom•e chanchirimaniko dakangengon, Resubelpara C&RD block-ko maming dakeba gipin biapchi ra•jitangna man•jawa ine jegalgrimani a•sel, Dainadubi-o gital block-ko on•china dabiani bilakbatroroenga ine nikna gita man•skaha.
Indake ong•engon, Dainadubi jolni manderang gital C&RD block-ko on•skachina a•dok sorkario dabiangskaha aro indaken gital block-ko Dainadubi-o rikna gita NGH a•jani Addl DC, Dainadubi-ona re•ange Monggolbar salo biapko niangaha ine u•iataha.