ADE, Conrad Sangma-ni kamko jegala aro duko ga•akenggipa manderangna chakpaa
Tura, March 24, 2022: Association for Democracy and Empowerment (ADE) Apex Committee HQ Tura-ni President Dalseng Bira Ch. Momin, a•dokni Skotong Minister Conrad Sangma-ni sriksrik Maikhuli songni manderango maming sing•sandia gri ua songko Assam a•dokna pakwataniko raken jegalataha.
“Meghalaya aro Assam a•dokni sima ariko namatna ine Conrad Sangma songni manderango maming sing•sandia gri Meghalaya a•dokni ning•o donggipa Malchapara, Salbari aro Maikhuli songko Assam a•dokna pakwate on•angaha. Chinga dos grigipa songni manderango maming sing•sandia gri uamangni janggilo ka•gipa kamko ra•chakna man•chong•motjawa. Je kamko ka•naba Conrad Sangma songni manderang baksa agangolpogrike uamangni raiko ra•na nanga. Mikkangchi re•baenggipa salrango Conrad Sangma-ni dakgualanichi songni manderang bang•a neng•nikanirangko chagrongna nangnaba donga. Uamang skango Atchu Ambini chasong-oni ua songo atchikapgipa manderang Meghalaya a•doko songdong a•chabaenga, indide dikdiksani somoion uamangko maikai sorkari gipin a•dokchi pakwatna man•gen. Uamango Meghalaya a•dokni Elektsin ID card-rang gnang, Aadhaar Card-rang gnang,MBOSE-ni ning•o Register ka•gimin skulrang aro MePCL Department-oniko bijolirangko man•paenga. A•dokni sima arirango kajia golmalko namatna sorkari a•a pakwatanichide namatna man•jawa, indiba dolgni a•dokni dilgiparang aro sima ario donggipa manderang baksa melie nangrime uamangni raiko ra•achisa namatna man•gen. Sorkari indakgipa kamrangode jinmani ku•rangko knachakna nangchong•mota Conrad Sangma an•tangtangni chanchianiko ong•nike maming kamoba ja•ku de•na man•jawa. Uamang jinmani nangnikanikosa knachakna nanggen aro unosa raikoba on•na man•gen” ine ADE-ni dilgipa Dalseng Bira Ch Momin parakataha.
Chinga Association for Democracy and Empowerment, Conrad Sangma-ni kamko raken jegala aro uko ra•chakna man•jawa. Chinga duko ga•akenggipa songni manderang baksa ong•a aro uamangni dabianiko knachakja dipet uamang baksa apsan chadenge kamko ka•anggen ineba parakataha.