NGCO Southern Zone-ni dilgiparang SGH-ni DC-ko gronge segimin lekkako on•ea

Baghmara, April 13, 2023: Niksamso Garo Community Organisation (NGCO) Baghmara Southern Zone-ni dilgiparang April 12 tarik, Butbar salo South Garo Hills a•jani Deputy Commissioner-ko gronge, Baghmara Block Office ramako tarie on•china mol•mole lekka sedoangaha.
NGCO, Baghmara Southern Zone-ni President, Arjun Marak-ni koborna u•iatani gitade, Baghmara Block Office-ona re•ruraengipa ramako ru•utbea bilsirangna tarigija galchipe donaha.

“Ia ramako bang•a manderang, Don Bosco Skul, Mount Bell Skul-ni bi•sarang, MeECL Office aro Tourist Office-ni manderang salanti re•a doanio, rama namjani a•sel namen neng•nikanilko man•enga. Uni gimin manderangni namgnina ia ramako ta•rake tarie on•na nanga” ine NGCO, DC-ko mol•molangaha.