Baghmara, Mar 17 2023:Re•anggipa Butbar salo Niksamso Garo Community Organisation (NGCO) Southern Zone Baghmara, Captain Williamson Memorial Govt College (CWMGC)-na gital rikenggipa building-ko re•ange nieaha.
NGCO dilgiparangni re•ange nion, CWMGC building rika namjae bretarangko nike, NGCO raken jegalata baksa kusi ong•gijaniko parakataha.
Uni gimin CWMGC building-ko name gital rikpilchina dabie, mikkangchi chatro chatrirangna namen kenchakani ong•enga ine parakataha.
NGCO Southern Zone-ni President Arjun Marak-ni parakata gitade, South Garo Hills-na on•atenggipa bang•a Scheme-rangkon name kam ka•jani a•sel bang•a biaprangon chu•sokna man•jaenga ine NGCO suk ong•gijaniko parakataha.
Uni gimin je contractor-an CWMGC building-ko rikna gita contract man•ahachim, name kam ka•china NGCO Southern Zone didiataha.
Contractor name kam ka•jani a•sel, CWMGC building-ko rikenggipa kuturi ge•antian brettokaha aro bretgiparangko cement-chi gola rudape donnuna jotton ka•enga ineba janapataha.
Mikkangchi CWMGC building be•gropnaba donga, uni gimin chatro-chatrirangna namen kenchakani ong•enga. Uni gimin je contractor-an CWMGC building-ko contract ra•e kam ka•engachim, name rikpilja ong•ode, contractor-ni kosako raka ja•kurangko de•anggen, ine NGCO Southern Zone mikkrakataniko on•ataha.
NGCO, ia CWMGC building-ko rikenggipa contractor-ni kamko name nirokatchina mol•mole a•jani Deputy Commissioner-na lekka sedoataha.