Shillong, November 16, 2022: Gnigipa changna Shillong songjinmao ong·atanggipa North East Olympic Games November 16 tarik attamo tom•tome aro nambee matchotatangaha. A·dokni Skotong Minister Pa Conrad Sangma-ni dilanichi ga•subee matchotangaha.
Conrad Sangma jinmana aganprakengon, “Na·simang pilakkon anga Meghalaya-ni Itihas-o gisik ra·na krabegipa ong•a. Rasong chabee ia 2-gipa changna ong·atgipa North East Olympic Games chu·sokgipa ong·aha. Ia manianiko ong·ataniara Salgro-Salaramni a•dokrangni dakna am•aniko aro mikkangchi chu·sokatna am•anirangko mesoksoani sakki ong·a. Iako anga pilaknan aganna sika. Meghalaya-ni team nambee chu·sokaniara krenge aro gisik nange kam ka·anichisa ong·aha. Re•anggipa 2018 bilsio Athletics-o gold medal ge-1 man·aoni ia bilsio ge-15 man·aniko an·ching nikna man·aha aro iana agreba gipin kal·susaanirangoba bang·a chu·sokanirangko man·aha. COVID ong·genchimoba, chinga kal·na changgiparangna dakchakanirangko on·aha, jedakode uamang nambata cholrangko aro skie ra·anirangko man·gen. Sorkari aro bang·a kal·susagipa dolrang, chegipa ong·na krimkro kamko ka·aha aro uamangni chu·sokanirangko nike anga namen katchabea. An·ching re·baenggipa 2023 bilsio National Games aro uandake dal·dalgipa manianirangko sokachaksona gita bilsokaha”. Meghalaya ge-36 gold medalrangko aro chu·gimik ge-149 medalrangko man·e cheaha.
Deputy Chief Minister, Prestone Tynsong, Sports Minister, Banteidor Lyngdoh, Cabinet-ni Membor-rang, Meghalaya Legislative Assembly aro District Council-rang Guests of Honour ong·e bakko ra·angaha.
Skotong Miniater, indakeba agandapangaha, “Iako ong·atgipa Organising Committee, kam ka·giparang, dingtang dingtang kamrangko ka·gipa dolrang ba agency-rang aro volunteer-rang jerangan re·anggipa antirango neng·takgija kamrangko ka·e ia manianiko chu·sokatna gita man•aha, uamang mittelako man·na kraa. Iandakgipa manianirango a•dokni kal·susagiparangna cholko on·na gita ong·ata, jeon uamang an·tangtangni changa-saparangni kri nambata gadangona sokna man·gen. Skigipa coach-rang, dakchakgipa staffrang, aro Chef-de-Missionskoba ia manianiko chu·sokatna man•ahani gimin mittelna sika. North East Olympic Association aro Meghalaya State Olympic Association, ia dol ge·gnikoba ku·cholsan kamko ka·e ia manianiko international standard-ni gita ong·atanina aro Department of Sports & Youth Affairs baksa kam ka·rimanina mittelna sika.” Iana agreba, ua Dorbar Shnongrangko aro Meghalaya Grassroot Music Project-ko uamangni krenge kam ka·e aro on·kange manderangko rimchaksoanina aro Shillong-ni rongchinganiko mesokanina mittelangaha.
Dr. Vijay Kumar D, Commissioner & Secretary aro CEO National Games Secretariat, ia manianio dongpas, “Archery-ni Games Director, angna jagni skang Archery World Cup-na Paris-o ong·mitingo, ia NEOG-ni Organisation-ara World Cup-ni gadang gita chacha ong·a” ine aganangaha.