Nengkra A•we songo 132 KV Grid Power Sub Station songna am•aniko NGO-rang jegala

Williamnagar, March 14, 2022: East Garo Hills a•jao donggipa Nengkra A•we song jatchio Transmission 132 KV Grid Power Sub-Station-ko donna miksonge a•a nokgiparangko gronge tangka paisana mikbokate sruk sruk agreement ka•aniko GSMC aro FKJGP Nengkhra Unit raken jegalataha.
Da•odipet iani gimin changsaba songdongenggipa manderang baksa tom•e chanchirima dongkuja aro sorkarini aro company-ni gitaba darangan re•baenba talate on•anirangko dakujaoba ramram manderangsa re•bae a•a nokgiparangko gronge sruk sruk tangka paisana mikbokate manderang a•atangtangko on•tokenga. Iani bidingo saksa sakgipinna dingtang dingtang kattarangko aganne agreement-ko ka•srukna miksonganira manderangni ka•dongna man•gijagipa kam ong•a ineba parakataha.
Uni gimin jinmana u•iata gri ka•gipa kamko ra•chakna man•jawa ine GSMC-ni General Secretary Tengman Marak parakatenba, da•odipet ia kam ba project-ni gimin songdongengipa manderangna maming u•iata gri sruk sruk kamrangko ka•engani gimin chinga skatang ia Project-rangko maming sakkirang gri a•bachengna on•jawa ine mikrakataniko on•ataha.

Iani bidingo FKJGP Nengkra Circle-ni President Tengkan Momin-ni parakatani gitade,”Chinga FKJGP aro GSMC dolgnian da•odpet joltangni namgninasa kamrangko ka•enga, uni gimin chinga mol•molatenga, songdongengipa manderang baksa aro dingtang dingtang dilgiparang baksa tom•e chanchiriman baksa maidakgipa Company-ni Project-ko rikna am•enga kakketko manderangna ui•atchenganiko nangnikenga.Unosa jolni manderang ra•chakani ong•ama ong•ja ma•sina man•gen aro jinmani nangnika gita mikkangaosa agreement-ko soi ka•na nanga ineba ui•ataha. Ong•jaode soi ka•grikani ja•mano songdongengipa manderangni a•arangko skatang agreement-o pangchake Company Project-rangko rikgenchimode manderangni ge•e game cha•enggipa a•arangsa gimaaniko man•gen.Uasan ong•aigija samtangtango game ge•e cha•giparangna neng•nikani mikangchi ong•naba gnang” ineba janapataha.