NAS poraienggipa chatro chatrirangni answer sheet-ko name nipilchina NEHU-ko didianga

Tura, March 9, 2022: Niksamso A•chik Society (NAS) Tura NEHU Campus-o poraienggipa chatro chatrirang Shillong re•angna nanggija an•tangtangni document-rangko okna man•gnok ine koborko man•soe bilongean ku•si ong•aniko parakataha.
NAS-ni President Tengrak Marak NEHU-ni nama kamna kusi ong•e mittelpilaniko on•ataha.
“NEHU Meghalaya a•dokni literacy rate-ko tang•dodapatna rake kamko ka•na nanga. Covid sabisi a•bachengani somoio NEHU-o poraienggipa chatro chatrirangko online gita porikkarangko ra•aha. NEHU-ni online porikkako ra•enba segimin answer script-ko kolege-tangtangona ra•ange on•echina ge•etronga. Indiba bang•a chatro chatrirang an•tangtangni marksheet-o absent seatako man•ne neng•nikaniko charongaha. Ia obostani bidingo chatro chatrirang badi ka•genchimoba, NEHU maming dakeba uamangna answer sheet-ko nigija mark-rangko on•jaha.
Uni gimin poraienggipa chatro chatrirang an•tangni man•na ka•dongsogipa mark-rangko man•jaha. LLB aro LLM-ko poraienggipa chatro chatrirang Ukil-na skie ra•na komibeoba 50%-ko nanga, indake ong•enggon online porikkarangko see chadamberang an•tangni man•na ka•dongsoana bate komie mark-rangko man•e miksongatangko skie ra•riknaba chol ong•jajok. NEHU-ni examiner-rang chatro chatrirangni segipa mark sheet-ko nikon uamangna kraa gita mark-rangko on•jaha aro answer sheet-ko nipiltaina man•a gitaba man•jaha” ine NAS-ni President janapataha.
NEHU re•anggipa bilsio India a•song gimiko komibatsranggipa literacy rate-ko man•aha. Meghalaya a•dokni literacy rate-ko tang•dodapatna aro namdapatna skigiparangni jakon ong•a. Uni gimin NEHU-o poraienggipa chatro chatrirangni answer sheet-ko name nichengesa uamangna kragipa mark-rangko on•na nanga ineba ua agandapataha.