Resubelpara, March 9, 2022:North Garo Hills a•jani Association for Democracy and Empowerment (ADE) Dainadubi Regional Unit, re•anggipa 2020 bilsini January 14 tariko Dainadubi PWD IB-ko taridapchina aro sub post office-ko songe on•china dabie a•dokni Skotong Minister, Conrad K. Sangma-na memorandum-ko on•ahachim, ua kamrangko ta•raken a•bachengatengaha ine u•iataha.
ADE, Dainadubi Regional Unit-ni seatgipa memorandum-o janapani gitade, Dainadubi-o donggipa PWD, IB-ko taridape on•china aro Dainadubi-o post office dongjani gimin, sub post office-ko songe on•china dabie Skotong Minister-na memorandum-ko on•ahachim.
ADE, Dainadubi Regional Unit-ni President Meckstar D.Shira-ni u•iata gitade, uamangni dabienggipa PWD, IB-ko ia bilsidipet tarina a•bachengataha aro sub post office-ko Dainadubi-o donna gita Monggolbar salo post office-ni manderang re•bae sub post office-na biapko niangaha aro ia jani gisepon kamko a•bachengatna ku•rachakngaha ine u•iataha.
Indake jolo dongenggipa manderangni nangnikaniko knachake kamrangko a•bachengatengani gimin ADE, Dainadubi Regional Unit-ni President Skotong Minister-ko mittelataha.