Williamnagar, April 15, 2022: Niksamso A•chik Society (NAS)-lni General Secretary Premiar N Sangma, a•dokni Veterinary and Animal Husbandry Department-ni Minister Sanbor Shullai-na lekka sedoataha.
NAS-ni janapatani gitade, East Garo Hills a•jani Dobu Veterinary Centre-ko batanggimin 2017 bilsion rika matchotaha, indiba da•ona kingkingba Veterinary Centre-o kam ka•gija galchipe donenga ine u•iataha.Dobu-o rikgipa Veterinary nokko bak bonga dake rikaha, indiba bak gnide nirokgija galchipe donani gimin buring dikkripe nosto ong•aha. Unbaksana bak gittamkode PHC-ni janggilo rike galchipe donskaenga. Ua songni sepang jolo donggipa manderang jillatangni janggiko jokatna pangnan Williamnagar-ona ra•anggenchimoba badiaba salrangode rasong gribee jokatna man•ja ine u•iataha.
“Anga Dobu songni wilwilao donggipa manderangni ku•rangko dilgiparangona sokatna kamko ka•enga. Songni manderang uamangni jilla kaanirang jekai do•o, matchu, wak, dobok, a•chakrangko pangnan sabisioni naljoke rakkina biji su•na gita chel•begipa Williamnagar Hospital-ona re•angna nanga. Uamang songtango Veterinary Centre donggenchimoba galchipe donanichi maming ka•donganiko man•ja. Uni gimin NAS, Dobu-o galchipe donenggipa Veterinary Centre-ko ta•rake kam ka•pilchina mol•molna sika, jedakode songo donggipa manderangna dakchakani ong•gen” ine Premiar N Sangma janapataha.