Shillong, April 15, 2022: All India Trinamool Congress (AITC) salgni skang Meghalaya aro Assam a•dokni sima arini golmalko namatna ine Memorandum of Understanding (MoU)-o soi ka•grikaniko raken jegala aro ra•chakna man•jawa ine parakataha.
“Meghalaya A•dokni Skotong Minister Conrad Sangma, Memorandum of Understanding (MoU)-ko soi ka•na skang sima ari jolo songdongenggipa manderangni namnika aro namnikgijako sing•e ra•chenggija an•tangni sika dakna bil dongja. Ua an•tangni namgniko nike chanchiatangko soi ka•aha. Chinga AITC dolni pilak membor-rang MoU-ko ra•chakna man•jawa” ine AITC dolni dilgipa Dr Mukul Sangma parakataha.
NPP dol baksa bakrime kamko ka•enggipa gipin dolrangba a•dokni sima ario ong•enggipa golmalko namatna on•gimin raini bidingo chanchipiltaianiko namnikenga ine kobor ra•timgiparangna aganaha.
A•dokni gitcham Skotong Minister Dr Mukul Sangma re•anggipa Budget Session-o uni agananggipa kattarangko gisik ra•atpiltaie, A•dok damgnini gisepo dongenggipa sima arini golmalko namatna gita saksan chanchiani aro ong•nikanichide ong•na man•jawa. Saksanni chanchianikosan ja•ku de•aigenchimode, golmalko dal•dapatna wa•alo to rudapa gitasa ong•aigen. Indiba budget session-o darangba uni agangipa kattarangna na•chil songjaha aro knachakjaha.Ua batanggimin salrango sima ario donggipa songrangona re•ange ground zero-oni sing•sandianiko dakna a•bachengaha, anga bebe ra•a MDA sorkarini sima ari jolo donggipa songrangni sima ari, sani a•kingo ga•aka uarangko sandina Regional Committee-ko donananiara uamangni man•gninasa ong•a, badia biap Assam-o ga•aka aro badia biap Meghalaya-o napagen iarangko Regional Committee songna skangan chanchie donmanaha.
Conrad Sangma “Give and Take Policy” ko ja•rikanggen ine aganaha, indide Assam a•dokni badia songrangko Meghalaya-na pakwate on•enga? Sima ari jolo donggipa bang•a songrang ‘Hima’-ni ning•osa ga•aka, uamangsa songko niroka simsaka aro niamrangko taria, indide Conrad Sangma-ara maiko chanchiesa uamango sing•cheng sanchenggija an•tang saksan raiko ra•aha? A•dokni manderang ia obostani bidingo maming koborko man•sojaha, indiba Conrad Sangma Memorandum of Understanding (MoU)-o soi ka•ani ja•mansa NGO-rangko aro gipin gipin Political dolni manderangko okamate sima arini kajia golmalko namatna ine tol•mike chanchirimaniko dakdilangaha. Chinga uni mitinno donnue ka•gipa kamko ra•chakna man•jawa aro duko ga•akenggipa songni manderangba ra•chakjawa ine Dr Mukul Sangma parakataha.