Williamnagar, April 15, 2022: Meghalaya a•dokni sima ari jolo donggipa bang•a songrangko Conrad Sangma-ni Assam a•dokna pakwataniko Niksamso A•chik Society (NAS) raken jegalataha.
Meghalaya a•dokko man•chengaoni je songrangan a•dokni ning•o ga•akachim, ua songrangko Assam a•dokna sriksrik pakwatgalaniara songni manderangko ka•saninggija kal•ake roa gita chacha ong•a. “Give and Take” Policy-o pangchake gipin a•dokna pakwataniara a•dokko dam gri ong•ata. A•dokni sima ari jolo songdongenggipa ma•a paarang, chadamberang, aro budepa buchumarang Conrad Sangma-ni indakgipa kal•stekaniko chagrongna nanganira kraani ong•chongmotja. NAS Conrad Sangma-ni daksrukgipa kamna suk ong•ja aro ua indakgipa bewalchin an•tangko namgipa dilgipa ong•ja ine mesoka ine NAS matnangaha.
“Skang chengo Meghalaya a•dokko man•na krenge dakgrikenba kamko ka•anggipa an•chingni gitcham dilgiparang jakgitele janggi tangchina ine an•chingna a•dokko man•ne on•angaha. An•chingni gitcham dilgiparang a•dokko man•ne on•na krenge janggitangna kengija warachake dakgrikangaha, indiba da•alo an•ching dilgipa Conrad Sangma a•atangko gipin a•dokna pakwate on•anichi on•tisaba jattangna ka•saani aro a•dokna on•kanganiko me•sokjaha. Ua an•tangni namgnikosan nikaiaha, indiba duko ga•ake dongenggipa manderangni mikchi ong•e kalime dongenganikode nikatjaha. Meghalaya sorkari, Assam sorkari-na dal•a daiko gamna nangani dongama? A•atangko indake sriksrik palsruknara. Chinga uni daksrukgipa kamko raken jegala aro ia dakgualaniko namatpilna ua kamko ka•na nanga. Chinga duko ga•akenggipa manderang baksa chadengpaa aro uamang baksa ia dakgrikanio chegipa ong•jana kingking krimkro krenge kamko ka•anggen” ine NAS parakataha.