Shillong, April 15, 2022: Assam aro Meghalaya a•dokni sima-ario melina man•gijagipa kajia golmalko, sorkari dolgni tik ka•e MoU-o soi ka•aniko songni manderang ra•chakna man•jaha. Meghalaya a•dokni Ribhoi aro Jirang a•jani ning•o donggipa adita songni dilgiparango sing•cheng-sangchenggija sriksrik kamko ka•ahani gimin skotong minister Conrad Sangma-ni kamna MPYC suk ong•gijaniko parakenba raken jegalataha.
Iarangni bidingo golpogrikna skotong ministerko grongna jotton ka•ahaoba man•jaha ine parakatenba, Meghalaya Pradesh Youth Congress (MPYC) duko ga•akenggipa songni manderangna chakpaaniko on•ne apsan jegalpaaniko dakna ku•mongrimaniko on•ataha.
“Chinga maming dakeba Meghalaya-ni a•ako Assam-na on•jawa, ia gisik gri kam ka•aniko chinga raken jegala aro namen dukko man•a. Conrad Sangma-ni ong•gijagipa kamara chingko namen gisiko sa•dikataha. Chinga iani gimin dakgrikanggen, supreme court-ona sokeba jekalangkugen, ine Maikhuli songni dilgipa Kleden Sangma kobor ra•timgiparangna duk ong•bee aganaha. Uamangna dakchakaniko on•na gita chinga an•tangtangko on•kangenga, chinga uamangna dakchakanggen. Manderang biaptang a•jatangna ka•pake grapenga aro Assam baksa chanchapaniko nangnikja” ine MPYC-ni President Adrian Chyne parakataha.