Mukul Sangma Borpathar aro Maikhuli songona re•anga, Duk mikchi ong•e grapenggipa A•chikrang CM-ni kamko jegala
Tura, April 6, 2022: Meghalaya aro Assam-ni Skotong Minister, Conrad Sangma aro Himanta Biswa Sarma re•anggipa March 29 tariko MoU-o soi ka•e, Assam aro Meghalaya a•dok ge•nini sima arirango donggipa Meghalaya a•dokni A•chik songrangko Assam a•doko chapatahani gimin, duk mikchi ong•e aro grape Budbar salo ma•giparang aro songni manderang jegalangtokaha.
Sima ari jolo songdongenggipa A•chik songni ma•giparang lekka paltakrango “Revoke MoU signed, We will give our blood, but not give our land to Assam” ba “MoU-o soi ka•giminko ra•galpilbo, chinga chingni an•chiko on•gen, indiba chingni a•dok chigako Assam-na on•jawa” ine seenba jegalangaha.
Dukko man•enggipa sima ari jolo songdongenggipa bang•a A•chik songni manderang, an•tangtangko Assam a•dokchi ma•eke watatako man•ne Budbar salo jinma jegake Skotong Minister Conrad Sangma, A•chik jatni grapako nie dongaigenma ineba sing•doangtokaha.
Indake duko ga•akenggipa Borpathar aro Maikhuli songni manderangko Meghalaya a•dokni warachakenggipa (LO) TMC dolni dilgipa Dr, Mukul Sangma, Salmanpara-ni MLA Winarson D.Sangma aro gipin dilgiparang Budbar salo re•ange grongeaha.
Dr Mukul Sangma-ni agan talatanga gitade, ‘area of difference’ maidake a•bachenga, je areako an•ching ra•chakgrikna man•jaenga, ia a•a chingni ine a•kangenga aro Assam-ni manderangba chingni ine a•kangenga, ua neng•nikaniara maini a•sel a•bachenga, jensalo Assam aro Meghalaya sima ariko Survey of India toaha, ong•gija toani gimin ra•chakja. Indake ra•chakjani giminsa ia neng•nikani area of difference donga iako namatchina ba solve ka•china on•aha. Da•oba ra•chakjaode apsan neng•nikani dongaigen. Jensalo Survey of India, inter-state sima ariko demarcate ka•na am•aha, ua demarcate ka•ani ja•mano ong•gija dakani gimin an•chingni Sixth Schedule areara A•kingni aro Hima-ni a•arang Assam-chi re•angani giminsa ra•chakja.
“A•ani dingtanggrikani ba area of difference a•bachengaha. Da•oba ra•chakgija dakdraode, namatna man•jawa, ong•gija dakdraode. ‘Justification of indicating as to which part of the land belongs to whom’ iade Meghalaya a•dokni kattasan ong•ja, manderangni kattasa, Meghalaya-ode sorkarini a•a dongja. Da•o Hima-Mellim-ni a•ao na•song dongenga, Hima-Mellim na•songko Assam-chi on•atjaode, maidake na•song re•anggen. Uko sawa dakenga uko sandina nanggen aro bisong gimikkon aganna nanggen, uamang an•tangni a•dok chigako nirokgipa ong•ani gimin, uni bal bojako ra•na nanggen” ine Dr Mukul Sangma aganangaha.