Tura, Dec 14, 2022: Dadenggre Mrong Mahari Association (MMA) bilsi 25 gapani salko December 13 tarik Monggolbar salo maniangaha ine koborna u•iataha.
West Garo Hills a•jani ning•o donggipa Dadenggre jolo songdongenggipa Mrong Mahari-rang, Dadenggre Mrong Mahari Association MMA-ko 1996 bilsio bikotchengoni bilsi 25 gapaniko sal ba Silver Jubilee-ko maniangaha.
Koborna u•iatani gitade, Dadenggre Mrong Mahari Association-ni Silver Jubilee-ko maniani salo Nokma Sordar-rang aro dingtang dingtang Maharirang jekai A•gitok Mahari Association, Raksam Mahari Association, Mankin Mahari Association, Chambugong Mahari Association, Nengminza Mahari Association-ni President aro Secretary-rang re•bae, bakko ra•angpaaha.
Indake Dadenggre Mrong Mahari Association-ni Silver Jubilee-ko maniaona Tura Mrong Mahari Association-ni President Jingjang M Marak aro General Secretary Rakkan M Sangma mongsonggipa sokgipa ong•e bakko ra•anngaha, unbaksa gipin sokbagiparangko, Dadenggre Mrong Mahari Association-ni President Arsin M Marak rimchaksoani kattarangko aganangaha.
Ia tom•anio dingtang dingtang mahari Association-oni sokbagipa manderang aro mongsonggipa sokgiparangko mande ra•pilskani gita Facilitation Program-ko dakangjolaha. Tom•anio Tura Mrong Mahari Association-ni General Secretary Rakkan M Sangma, jinmana aganangengon, ua namgipa didiani kattarangko aganangaha, chong•motan Mrong Mahari-rang bilsi 6,000-na skangan dongaha, indiba iani bidingo darangba sandie nigiparang dongkujaenga. Uni gimin Mrong Mahari-ni ong•baaniko sandie nichina chadamberangko didiangaha.
Indake tom•ani bon•kamao, Silver Jubilee-ni Convenor Konen A Sangma pilak sokbagiparangna mittelpilskaani kattarangko aganne, Mikkangchiba Mahari Ma•drangni gisepo aro dongrikeng pilak mahari baksa meli nangrime pilak kamrangon apsan ku•monge kamrangko ka•angkuna ku•mongangjolaha.