Tura, September 10, 2022: Meghalaya Pradesh Youth Congress Committee (MPYCC), Congress Party-ko Grassroot Level-oni India a•song gimiko bilakatna, Sonibar salo “Youth Jodo” Campaign-ko ong•atanga.
Ia campaign ba movement-ko Tura Congress Bhawan-o ong•atangaha aro ia campaign-ko ong•atanio India Youth Congress (IYC)-ni General Secretary Nur Sofiqul Wazid, dongpae bakko ra•angaha. Una agreba Meghalaya Pradesh Congress Committee (MPCC)-ni Secretary Roger Benny A.Sangma, Garo Hills-ni Mahila Congress President, Ma Joshpine R.Marak, North Garo Hills a•jani District Youth Congress Committee, President Timjim K.Momin aro gipin dilgiparang campaign-o bakko ra•angtokaha.
Unbaksana dingtang dingtang Garo Hills a•jarangoni jekai Dalu, Chokpot, Williamnagar, Tura, Resubelpara Youth Congress-ni dilgiparang aro membor-rang re•bae bakko ra•angaha.
Meghalaya Pradesh Youth Congress Committee (MPYCC)-ni General Secretary Junebirth C.Marak-ni agananga gitade, Meghalaya a•doko aro India a•song gimiko NPP aro BJP sorkari ong•gija sasonni bilrangko jakkalenggipa Fascism, Corruption aro Communist-ni kosako jegalan baksa India a•songni Democracy-ko pe•galenga ine matnangaha.
Unbaksana skia man•ne kam gri dongenggipa (Unemployment) chadamberangko bon•atchina, bosturangni dam barianiko aro Democracy-ko nosto ka•enganiko dontongchina ba bon•atchina ku•rang on•na gita ia campaign-ko ong•atangaha.
Iandakgipa niamrangko jakkale BJP dolni India a•songko sason ka•aniara a•songni manderangna namen kenbeani ong•enga. Uni gimin India a•songko Democracy-ni bewalo saaon ka•na nanga ine IYC aro MPYCC dabiangaha.