MPYC, sak 3 Congress party ticket man•giparangko ra•galpilchina konta 24 somoi on•a 

Tura, Jan 27, 2023: Meghalaya Pradesh Youth Congress (MPYC) Bristibar salo Tura Congress Bhavan-o tom•aniko ong•ate, re•baenggipa eleksino susaenggipa candidate-rangna ticket on•ani bidingo raken jegalataha.

MPYC-ni General Secretary Robath K.Sangma kobor ra•timgiparangna aganani gitade, MPCC-ni kamko raken jegalataha.

MPYC dilgiparangni jegalatani gitade, AICC aro MPCC dilgiparang an•tangtangni namnikgipa manderangna party ticket-ko on•aha. Indiba jemangan Congress party-ni gitcham membor-rang ticketna galahachim, uamangna on•gija, gital naparngnasa party ticket-ko on•aha ine parakataha.

Uni gimin,January 25 tariko Congress party ticket man•gipa gital candidate-rang Salmanpara elakkani Sinbath Ch.Marak, Gambegre elakkani Saleng A.Sangma aro Selsella elakkani Reynold M.Sangma-ko ta•rake ra•galpilchina dabie konta 24 somoiko MPCC dilgiparangna on•ataha. Uni gisepon, uamangko ra•galpilja ong•ode, MPYC raka ja•kuko de•anggen ineba parakataha.

MPYC party-tangna kimkim kamko ka•engon, MPCC-ni dilgiparang pangnan grass-root level-ni dilgiparang baksa chanchirimgija, an•tangtangni sika gita party-ko on•aha, ian MPYC-ni ra•chakna man•gijagipa kam ong•a. Uni gimin Congress party-ko bilaktna aro Candidate-ko cheatna gitade apsan ku•monge kamko ka•na nanggen, indiba chubata gadangni dilgiparang pangnan grass-root level-o kam ka•giparangko onchepe ba mikchepe ra•a, uni gimin party candidate-ko cheatna grass root level aro chadambe dilgiparang baksa apsan ku•mongesa party ticket-ko on•na nanga, unosa Congress candidate chena gita man•gen. Congress dilgiparang maming saloba mikkang nitee kam ka•na nangja, Congress party-ko bilakatna apsan ku•mongna nanggen, ong•jaode, Congress party bon•chipgen ineba parakataha.