Shillong, June 23, 2022: Meghalaya Pradesh Trinamool Congress Committee (MPTMCC) Monggolbar salo tom•aniko ong•ate, Meghalaya Pradesh Trinamool Youth Congress Committee (MPTYCC)-ko songe dilgiparangko seokangjolaha.
Meghalaya Pradesh Trinamool Youth Congress Committee-o sak 25 membor-rangoni Fernandez S.Dkhar-ko President songaha. Unbaksana Rinaldo K.Sangma aro Edmud Khongngi-ko Vice-President-na seokaha.
Meghalaya Pradeah Trinamool Youth Congress Committee-o sak 4 general Secretary-rang, sak 7 Joint Secretary-rang aro sak 11 Executive Membor-rangko seokaha ine MPTCC-ni President Charles Pyngrope parakataha.
Indake ong•engon, TMC MLA aro warachakenggipa dolni Chief Whip George B Lyngdoh, Meghalaya-oTMC namen bilalani tang•doenga aro mikkangchi a•dok gimikon bilakbatrorogen ine ua an•tangni ka•donganiko interview-o sing•anina aganchakaha.
Una agreba Meghalaya-ni TMC-o bakrimwnggipa aro chu•gimik chakpaaniko on•giparang ta•raken tang•doenga aro a•dok gimiko ta•rakbate bilakbatroroenga ine talatangaha.
“Chinga, chingni Organizational group-rangko ge 50 elakkarango songmanaha, unbaksana chinga Garo Hills-ni ge 24 elakkarang gimiko aro mitam Khasi Hills-o matchotmanaha” ineba Lyngdoh agandapataha.
Unbaksana Youth Committee-o bang•a chadamberang aro chadamberangko dilna changgipa aro bil gnanggipa chadamberang kimkim ong•e party-o bakko ra•tokenga aro uamangni ku•rang on•anichi Meghalaya a•dok mikkangchi niksenggipa ong•chongmotgen ineba janapataha.