MoU ko ra•chakgijagipa songrangona re•e doe uamangni rai ko sing•sandiangna nanga: Mawthoh
Shillong, April 14, 2023: Meghalaya aro Assam a•dokni sima ari o ong•enggipa kajia golmalko namatna gita ja•ku de•grikanio skanggipa changna soi kagimin Memorandum of Understanding (MoU) ko nipilangna nanga. MoU ko je songrangan ra•chakna jegaltokengachim, ua songrangona re•e doenba obostako niroksandiangna nanga ine United Democratic Party (UDP) dolni General Secretary Jemino Mawthoh aganaha.
” Indita bilsirangona kingking a•dokni sima ari ni bidingo darang MDA sorkari aro Skotong Minister ja•ku de•anga dongjaha. Indiba da•o ong•enggipa MDA sorkari ia obostani bidingo ja•ku de•angaha, jean namgipa kam ong•a. Indake ong•engon sima ari ni bidingo gnigipa chanchianiona re•angna skang, je songrangan MoU ko ra•chakna jegalengachim, ua songrangona re•ange sing•sandian baksana uamangni nangnikarangkoba ma•sie ra•na nanga” ine Mawthoh aganaha.
MoU ni skanggipa phase ko adita songrang ra•chakna man•jagenchimode maikai gnigipa phase ona re•anggen ineba Mawthoh aganangaha.