Tura, July 26, 2022: Git ring•anio mingsing minggamako man•gipa Monika D Momin, uni gitrang jekai I wana be a Tik tok..tik tok, MB bon•changpila aro uandake bang•a gitrangko ring•ahachim, uko Monggolbar pringo Tura Women Pulisrang uni kosako badi ka•ani bidingo sing•sandianiko dakna rimeaha ine koborna u•iataha.
Pulisni u•iatani gitade, ua badingchiwale cha•enggipa manderangko dagrange ka•mikennatenga, palna ra•baenggipa bosturangko ra•sekdraenga, unbaksana bading chiwalenggipa manderangko uni Womens’ Trading Organization (WTO)-o bakko ra•china ge•etenga ine badi ka•aha.
West Garo Hills a•jani SP VS Rathore-ni u•iatani gitade, uko Monggolbar pringo Tura songjinmani ning•o donggipa Chunmati sepango donggipa Chengkurigre gittimoniko rimeaha.
Batanggimin salrango Monika aro uni dolrang dokkan dakgiparangni sada, biri ba ta•makkurangko ra•sekdrae uko palna gita maming license dongja ine jegalahachim.
Monika Momin a•jao bading chiwalenggipa pilak manderangkon segipani ning•o donge kamko ka•atna ine aganaha. Indake uni kosako badi ka•ani gitade, ua na•tok, be•en aro do•o palgiparangko uni segipani ning•o donge kamko ka•china ba ong•jaode WTO dolo napna nanggen ine manderangko ka•mikkenataha ineba SP parakataha.