Tura, July 26, 2022:Garo Students’ Union, Centre Executive Committee (GSU-CEC)-ni gitcham President, Alexander Grahambell Marak ru•uta somoirangna be•enni sabisiko man•ne Sukrobar attamo an•tangni ka•sagipa jik dedrang, mahari ma•drang aro ripengskarangko wate jringjrotna neng•takram biapona re•angaha.
Uni a•gilsakko wate re•anganichi A•chik jatna dal•bea gimaani ong•aha.
“Na•a a•gilsako dongjahaoba, nangni namgipa kamrang pangnaba gimajawa, chingni ka•tongo na•a tangkuenga, chinga pangnan nangko gualja. Nangni janggina aro dingrikenggipa Nokdangni manderangna chinga bi•chakan baksa chingni duk ong•rimpaaniko on•atpaenga, Nangni janggi tom•tomao neng•takchina” angni sika aro bi•a ine GSU-CEC-ni Assistant General Secretary Salman D.Sangma nokdangni manderangna kalimpaaniko parakataha.
Alexander Grahambell batanggimin 2009 bilsio GSU-CEC-ni President ong•e kamko ka•angaha aro Shillong-o Law poraimittingoba GSU Khasi Hills Zone-ni Vice President ong•ge jatna dangdike on•angaha.