Michael Marak aro Ronjit Sangma-ni kosako Gondenggre songni manderang badi ka•a

Tura, March 24, 2022: Gondenggre songni Jonath Marak Budbar salo West Garo Hills a•jani Superintendent of Pulis (SP)-na lekka sedoatenba Michael Ch Marak, Ronjit T Sangma aro uamangna chakgipa manderangni kosako badi ka•doangskaha.
Jonath Marak-ni u•iata gitade, March 14 tariko Michael Marak aro Ronjit T Sangma-ni dolrang Kenedy Marak-ni dolko aterangchi aro ma•manti saknaatgipa bosturangko ra•bite den•na su•na jotton ka•aha. Uamang me•chik mangmangkoba watgija uamangko chadrape so•otna jotton ka•aha. Ia koborko, obosta ong•ani apsan salon Kenedy Marak aro songni manderang Jengjal Pulis Station-o badi ka•ahachim, indiba Jengjal Pulis Station-ni Officer-in-Charge, Vicky K. Sangma uamangni badi ka•aniko ra•chakjaha.

Ia badi ka•ani bidingo Michael Marak aro uni manderang bikpile Kenedy Marak aro uni manderangko tol•e badi ka•aha aro uamangni badi ka•akosa ra•chake, Kenedy Marak aro gipin sak 5 manderangko rim•e pattoko chipaha.

“Vicky K. Sangma dos gri manderangni kosako tol•e sakki on•ako knachake dos gri manderangko pattoko chipaha. Ua salo maimancha ong•a aro sawa kakket aro sawa tol•e sakkiko on•achim, uko sing•sandigija Michael Marak-ni tol•e badi ka•gipakosa ra•chakaha. Ua salo Michael Marak aro uni manderang Gondenggre songni manderangko atte ra•e den•na chadrapaha, indiba rasong gnange songni manderang darangba saknaako man•jaha. Ia obostani bidingo badi ka•genchimoba Jengjal Pulis Station-ni OC nachiltangko mittipe knachakgijaha, indiba Michael aro Ronjit Sangma-ni badi ka•anikosa ra•chake Kennedy Marak aro gipin sak-5 manderangko da•ona kingkingba pattoko chipe donenga” ine Jonath Marak u•iataha.

Ia obostani bidingo name sing•sandianiko dake darangkoba mikkang nitegija kakket bichalko dos grigipa manderangna ra•bana nanga ine ua WGH a•jani SP-ko mol•molangaha.