Tura, Meghalaya 24, 2022: Gondenggre songni manderang Jengjal Pulis Station-ni Officer In-charge, Vicky K. Sangma-ni kosako Budbar salo badi ka•enba West Garo Hills a•jani Supertindent of Pulis (SP)-na lekka sedoangaha.
Koborna parakatani gitade, Michael Ch. Marak aro una chakgipa manderang March 12 tariko Gondenggre songni manderangko atterang aro ma•manti bosturangko ra•bite chadrapna jotton ka•an baksana kragija kattarangchi saie chonnikaha aro uamang Gondenggre A•kingo ripingengipa buring bolgrimrangko nosto ka•an baksana bang•a nokdangni guerangko so•e galaha.
Ia obostani bidingo Gondenggre songni Kennedy Ch. Marak, Michael Marak aro una chakgipa manderangni kosako March jani 14 tariko Jengjal Pulis Station-ona re•ange badi ka•eaha, indiba Jengjal Pulis Station-ni Officer badi ka•aniko ra•chakjaha ine u•iataha.
“Anga Gondenggre songo ong•anggipa obostani bidingo Jengjal Pulis Station-ni Officer In-charge Vicky K. Sangma-na lekka see badi ka•aha, indiba ua angni badi ka•aniko ra•chakjaha batesa ua angko aro ang baksa dongpagipa songni manderangko pattoko chipgen ine ka•mikkenataha. Chingni badi ka•ani ja•man March 16 tariko Vicky K. Sangma, Ronjit Sangma aro Michael Ch. Marak-ko chingni kosako tol•e badi ka•china didiaha. Michael Ch. Marak aro Ronjit T. Sangma uni didianiko man•ne chingni kosako tol•e badi ka•aha. Uamangni badi ka•akosa Vicky K Sangma ra•chake, Kennedy Ch. Marak baksa gipin sak 5 manderangko rim•e pattoko donataha aro uamang da•onaba pattokon dongkuenga. Gondenggre songni manderang indakeba aganaha, Vicky K Sangma, Michael Marak aro uni manderangna chakgenchimode, a•a on•gen ine ku•rachaka baksana chu•onga gita tangka paisarangkoba on•aha” ine Gondenggre songni Jonath Marak u•iataha.
Re•anggipa 2021 bilsion Vicky K. Sangma-ko Jengjal Pulis Station-oni kam ra•jitangahachim, indiba ua re•angna sikjae, dilgiparangko mol•molenba uko apsan biapon donpilaha. Ua Michael Marak-ni ku•rachakgimin a•ana mikboke dos griko dos gnangate sak 6 manderangko pattoko chipaha aro ia kamara gimikni nikanion kraani ong•chongmotja. Ua sorkarini on•gimin bilko namgija kamna jakkalsretenga.
Uni indakgipa kamrangko nigrike sorkari uko bichal ka•an baksa dos gri pattoko chipa man•gipa manderangko jokatna nanga ineba janapataha.