Meghalaya-ni a•ako inch-saba Assam-na on•jawa:NGO

0

Malangkona, April 13, 2022: Meghalaya aro Assam a•dokni sakgni skotong minister-rang re•anggipa March 29 tariko Delhi songjinmaona re•ange Home Affairs-ni minister-ko gronge, a•dok damgnini sima arirango dongenggipa Meghalaya a•dokni adita songrangko Assam a•dokchi pakwatatna gita Memorandum of Understanding (MoU)-o soi ka•grikaniko raken jegalangtokaha.

Ia so•sojengjeng ong•enggipa obostarangni bidingo Mallangkona songni manderang, Garo Hills-ni dingtang dingtang NGO-rang jekai GSU, ADE, AYWO, NTDF, Tura Senior Citizens Forum, GGU, AIGU, GSMC, AHAM, Khasi Hills-ni GSU, West Khasi Hills-ni KSU Mawshynrut Circle aro Langdongdai-ni Sodarship apsan ku•monge tom•anio dongpae Meghalaya a•dokni a•akrango maming dakeba Assam-na on•jawa ine jegalenba skotong minister Conrad Sangma-na rakgipa ku•rangko on•ataha.

Malangkona Area Development Organization (MADO)-ni Vice President Enosh Momin tom•bagipa NGO-ni dilgiparangna parakatani gitade, Meghalaya a•dokni Skotong Minister Conrad Sangma, re•anggipa 2021 bilaini November 28 tariko Mallangkona songni manderangni namnikako ra•esa kam ka•gen ine ku•rachakachim. Indiba songni manderango, Shyiemship aro Sordarship-rango mamingkoba sing•gija an•tangni sika gita MoU-o soi ka•e, 1972 bilsioni songsong a•chaenggipa Meghalaya a•dokni manderangko Assam-chi ga•pakgalatengjok.
“Chinga iani bidingo changni chang uko (Conrad Sangma)-ko gronge, mol•molahachim, indiba chingni mol•molaniko knachakjae da•alo A•chik jatko duk mikchi ong•ate so•sojengjeng ong•atengjok” ine Enosh Momin jinmana parakangaha.
Indake KSU Mawshynrut Circle-ni President Amrstrong Sohshang, Shillong aro Nongstoin-ni KSU dilgiparang Mallangkona jolni obostara maimancha ong•enga tom•anio dongpae sandie ra•echina watatako man•ne re•baaha.
“Maming dakeba Assam-chi watatgipa a•arang, Assam-ni ong•chongmotja Meghalaya-ni a•arangsa ong•a. Uni gimin chinga KSU-ni gitaba maming saloba Assam sorkarina watna man•chongmotjawa. Na•song iani gimin sengbo, na•song jedake krenga, chingaba krengchong•motgen.Ia Mallangkona-san ong•ja Langpih, Birangatha aro Maikhuli songni gimin chinga Sukrobar salo Sordar-rangko grongna Langpih-chi re•ange badia Sordarship-ni ning•o ga•akachim, chinga sakkiko man•aha, Assam-ni a•a ong•chongmotja, uni gimin na•simangni krenga gitan chingaba dakgrikgen” ine Sohshang ku•rachakangaha.

Apsandake Langsongdai-ni Sodar Polash Rengtaph, Conrad Sangma namen gualaniko dake Meghalaya-ni a•arangko Assam-chi on•atenga, iano Nokma sakgittam gnang ine aganangaha. Conrad Sangma ia MoU-o soi ka•na skang Shyiemship aro Sordarship-rang, district council-ni CEM aro EM-rangko okame sani a•dok chigao ga•aka aro Meghalaya-ni sima ari bdia gita ong•a uko sandigija an•tangni namnika gita skatang kamko ka•e MoU-o soi ka•aha ineba aganangaha.

Indake ong•engon, Garo Hills-ni NGO dilgiparang Conrad Sangma-ni kamko jegale, jerangkon Assam sorkarina on•atengachim, inchisaba Meghalaya-ni a•ako Assam-na on•jawa ine parakataha.
“Chinga da•alo dukko man•enggipa A•chikskana mikchi ga•aka, uni gimin chinga Garo Hills gimikni NGO-rang baksa ku•monge dakgrikgen. Conrad Sangma nang•ko jatna aro Meghalaya a•dokna nama kamko ka•chinasa seoke watatachim, A•chik jatko duk mikchi ong•atchina aro Meghalaya a•dokko Assam-na on•atchina seoke watatja. Uni gimin nang•ni soi ka•gimin MoU-ko ta•rake ra•galbo aro nipiltaibo. Na•aba bilsi 5-san Skotong Minister ong•aigen, uni ja•manode ching gitan ramram mande ong•gen. Na•a jatko onchepna, atchu ambini ding•ol gramchie, pattoko chipako aro doka satako man•ne dakgrikenba man•ne donanggimin Meghalaya a•dokko gimaatna am•engama. Na•a dilgipa ong•na kraja, ian nangpani jumangma. Na•a A•chik ong•e, jattangni mikchi ong•ako nina sikama. A•chikde A•chik jeo dongoba A•chik an•chian ong•a, na•a an•chi pari ong•e dakgrikako nikna sikengama, chinga dakgrikgen” ine NGO-rang ku•rang on•grimattokaha.

Leave A Reply

Your email address will not be published.