Shillong, Jan 11, 2023: Meghalaya a•doko daka rikani bidingo dal•roroatna kamrangko ka•angna a•dok sorkari krenga ine u•iataha. A•dokni manderang nambata gadango janggi tangani aro mikkim rasongko mesokna miksongani ong•a.
A•doko bang•bate kamrngko ka•aniara a•doko namroro silroroaniko bilakata. Daka rikanio kam ka•anirangara gama ge•aniko dal•dapatna dakchakanisan ong•aija, indiba karkanarangko dakanio, pal•a sim•anio, aro janggi tanganio namgipa cholrangko bang•batatna dakchaka. Re•a doani gari-gorarang, bijoli aro uandakgiparang, kobor on•ruraani cholrang dingtang dingtang kamrangchi dal•roro silroroaniko ra•bana World Bank-ni am•sandie niani gita, bang•a dingtang dingtang a•songrango GDP-o percent 1 lap man•na daka-rikanio koros ong•ani percent 1 bariaha.
Meghalaya a•dokko chalaigiparang daka rikaniko namdapate janggi tangani gadangko namdapatna, skanggipa miksongani ba First Plan-ko a•bachengaonin, daka rikaniko dal•e aro name dakna nangchongmota. Iani a•selan, a•dokni ning•o dingtang dingtang daka rikanirangko nikna man•aha. Daka rikani kamrango bilakgipa pangchakani krongko songna man•aniara re•anggipa bilsirango janggi tangani gadangrangko namdapatani aro gital economic reform-rangko chu•sokani a•sel ong•a.
Meghalaya Legislative Assembly Project, 2001 bilsirangonin kam ka•na chanchie dongimin ong•achim, indiba bilsi 20 ong•nasipile maming kam ka•anirang dongjaha. Ia proposal-ko 2018 bilsio MDA sorkariko chalaina a•bachengani somoio Skotong Minister Conrad Sangma jako ra•enba bilake kamko ka•aha. Pandemic sajinmachi neng•nikanirangko man•genchimoba, ia project-na kamrangko 2019 bilsini June jao a•bachengataha. A•brio songdonggipa manderangni dakbewalko aro Meghalaya a•dokni mikkim rasongko a•song gimikni mikkango mesokaha.
Iana agreba, gong kror 150-ko jakkale ge 10 district administration complex-rangko rikna miksongenga. A•dok sorkari gong kror 120 tangkarangko jakkale block office-rangko rikgen ine parakataha.
Meghalaya Legislative Assembly-ni Speaker Metbah Lyngdoh, Assembly building nokko rikani gimin janapatengon, “Speaker gitcham Dr Donkupar Roy sagini janapanggipa Mawdiangdiang-o gital Assembly building-ko ru•uta bilsirangni ja•mano Meghalaya Democratic Alliance (MDA) sorkari bilo ong•ani ja•mansa ra•chakaha. 2019 bilsini June jao pandemic-ni a•sel somoirangko galna nanggenchimoba, da•o anga bebe ra•a, Mawdiangdiang-ni Meghalaya Legislative Assembly building a•dokni mikkim rasongko mesokgipa ong•gen.”
Gital daka rikanirangko dakaniara a•doko manderangni jelroroanio namdapaniko on•gen. Namgipa daka rikanirangara chadamberangko gital cholrangko sandina didianiko on•gen. Ru•utgija salrangna skang oprake on•gipa Shillong IT Park a•dokni skie ra•chakram biaprango poraie matchotgiparangna chu•sokatna dakchakni chol on•gen. Uano ge 1,500 kamrangko bikotna man•aha aro da•o ge 3000 kamrangko bikotna miksongenga ine parakataha.
Jemangan seng•gipa sapgipa chadamberang a•palchi kam sandianganiko komiatna gita man•gen. Ia bilsini gisepo, apsandakgipa industrial incubation aro youth centre-ko Tura-o niksamsoenga. Tura Incubation and Youth Centre-ko wilwilao gital bading chiwalani cholrang aro kamrangko on•dapna gita tarienga ineba u•iataha.
A•doko dingtang dingtang cultural and athletic centre-rangko rikna sorkari bang•a project-rangko on•manaha. Mingsa kamara adita salrangna skang Tura-o rikgimin PA Sangma Sports Complex, ong•a jeon sak 10,000-na asongchakani aro gadangni kri rikgimim ong•a, jeon national aro international kal•susaanirangko ong•atna man•gen. Iako rikanichi a•dok gimiko kal•susaanirangko namdapatna dakchakani ong•gen.
JN sports Complex aro indoor stadium, JN sports Complex aro outdoor stadium, Wahiajer multi-sports Complex, Shillong International Centre for Performing Arts and Culture (SICPAC) minggipin ong•a.
Uana agreba, hotel industry-ni bidingo sorkari namdapatanirangko dakna kamrangko ka•enga. Vivanta by Taj Hotel-ko Shillong-o oprake on•aha. Sorkarini dakdilanichi Courtyard by Mariott-ko ru•utgija salrangni gisepon oprake on•na miksongenga. Ia hotel ge•gni, a•dokni tourist business-ko namdapatgen.
Meghalaya Asia-ni Salgipeng Salaramni antidamrangona sokna namgipa biap ong•a. Indiani sambao donggipa a•songrang jekai Bhutan, Bangladesh, Myanmar a•songrang baksa bading-chiwalani kamrangko ka•aha. Gipin a•songrang baksa bading chiwalanirangko dakna a•doko cholrang donga. Meghalaya-o dingtang dingtang a•ningni gamrang bang•en donga aro ia bosturango pangchake karkanarangko a•bachengatna chol donga. Iarang pilakko dakna gita, Meghalaya Industrial Policy-ko ra•gatanichi pala sim•ani bading-chiwalanio altuae dakna man•na tariaha. Meghalaya-o sin•a dinganiara electronic chipsko tarina namgipa cholrangko on•na ineba janapataha.