Shillong, April 21, 2022: Batanggimin sal somoirango mikka jimbee wae balwa rakanichi bang•a singrangon nok jam gri ong•tokaha.
Ia obosta ong•anio Meghalaya a•dokni sak bri manderang janggitangko gimaataha aro nokdang te 2000 mang nosto ong•ako man•aha ine u•iataha.
Disaster Management-ni Minister Kyrmen Shylla-ni u•iatani gitade sak 10,263 manderang mikka balwa rakani a•sel bang•a neng•nikanirangko man•tokaha. Nok te 160-de chu•gimik nosto ong•aha aro te 2,199-de adita nosto ong•atako man•aha.
“Ia a•selo sianggipa sak bri manderangoni, sak gnide, Mawkynrew Block-ni ning•o donggipa Mawlat songoni ong•a. Uamang sakgni a•a be•dapei janggitangko gimaataha. Meghalaya a•dokni dam 12 a•jarangni gisepo Ri-Bhoi a•jani bang•bea nokdangrang nosto ong•angako man•aha. Ri-Bhoi a•jani ning•o donggipa Umsning Block-o song dam 47 nokdangrang nosto ong•ako man•aha aro Bhoirymbong Block-ni ning•o donggipa song dam 29 nokdangrang nosto ong•ako man•aha” ine Shylla parakataha.
Re•anggipa Aprilni 17 aro 18 tarikrango mikka jimbee waan baksana stilrang ga•akanichi Eastern West Khasi Hills a•jani ning•o donggipa Mawthadraishan Block-ni ning•o nok te 3 chu•gimik nosto ong•aha aro nok te 690 adita nosto ong•ako man•aha. East Jaintia Hills a•jani Wapung Block-o April 15 tariko nok te 1-ko wa•al kamgopani a•sel nosto ong•ako man•aha.
Uandake apsan salon West Jaintia Hills a•jani Amlarem Blocko goera gopretanichi matchu mang 6 siaha ineba u•iataha.