21 Jan 2022, Tura: Meghalaya a•dokni bilsi 50 gapani sal ba Meghalaya Day-ko a•dokni skotong Shillong songjinmao mongsonggipa ong•e maniangengon, apsandake Tura DC Park-oba Meghalaya Day-ko maniangaha. Meghalaya a•dokni bilsi 50 gapako mania-o West Garo Hills a•jani Deputy Commissioner Ram Singh mongsonggipa sokgipa ong•e bakko ra•angaha. Ia program-ko West Garo Hills a•jani District Administration ong•atangaha. Meghalaya a•dokni bilsi 50 gapahani gimin aganangengon,
“Meghalaya a•dokni ong•bachengani History ba see rakkigiminrangko nipilattaie manderangko gisik ra•atpiltaiengon, skango jegita ong•achim, apsandake buring bolgrimrangko nitoriri tangsekgilgil ripingangna, matburingrang aro knatoriri mikoenggipa do•o matrangko mikkangchi name ripingangchina aro uarangko chel•chake ba naljoke rakkichina manderangko didiangaha. Una agreba gamchatgipa bolrangko a•jao ge•rikrikchina didienba buringrangko gital ong•piltaiatna nanga jedakode chiring chibisikrang tangkamgen” ine Pa Ram Singh aganangaha.
Meghalaya Day-ko maniani salo Council of Nokma-ni President aro IGP kamoni neng•takgimin Skylance G Momin-ba tom•anio dongpae Meghalaya a•dokna kingkot dakgrikdile manderangni nangnikaniko man•ne on•anggipa A•chik Matgrikrangko mitele aganangaha. Indake ong•engon, GHADC-ni gitcham CEM, Albinstone M Sangma, da•o jean bilsi 98 gapahachim, uni jinma baksa manianiona sokbae bakrimaniko nikna gita man•naha. Ua 1972 bilsini January 21 tariko chu•gimik Meghalaya A•dok-ko man•ani somoio Shillong Garrison Ground-o dongengachim, indake Meghalaya a•dokna dakgrikanio gisiko nangbee bak-ko ra•giparangoni ua saksa mang mang da•alona king king janggi tange dongpaenga.
Blessibon R Marak jean Meghalaya A•dokna dakgrikmitting somoio student volunteer ong•achim. Jensalo Meghalaya a•dok bilsi 50 gapani sal ba Meghalaya Day-ni gimin tom•bagiparang aganengon, ua dakgrikanio volunteer ong•ani gimin namen rasong chabeaha aro Separate Hill State-ko dabina a•bachengani miksongara ba ja•pangara, Assam a•doko Assamese Ku•sik-ko mongsonggipa ku•sik dake ra•gatani a•selsa Hill State-ko dabina draatako man•aha ine ua aganaha.
Indaken dilgiparang Captain Williamson A. Sangma-ni dilachi aro bang•a gipin dilgiparang aro Volunteer-rang 1972 bilsini January 21 tariko chu•gimik Meghalaya a•dokko man•aona dakgrikaha ineba ua aganaha. A•dokni bang•a dingtang dingtang biaprango namroro silroroani gimin janapatengon, a•doko mikkangchi nambatgipa bilsi karirang sokbagen ine ua an•tangni ka•dongsoaniko parakangaha. Meghalaya Hill State Movement-na gisiko nangbee on•gilgipa membor-rang aro student volunteer-rangko namnikani chin gita chonbegipa mittelpilani boksisko on•angaha. Uamangara Captain Williamson A Sangma sagi, Emerson Momin sagi , Emonsing M Sangma sagi , Rangam G Momin sagi , Karnesh R Marak sagi , Mody K Marak sagi , Bronson W Momin sagi , Grohonsing A Marak sagi, Sandford K Marak sagi , Nimosh S Sangma sagi , Garnette Bangshal sagi , Anondo Kishore Ghosh sagi , Suresh Das sagi , Rosely P Marak sagi , Percylina R Marak sagi , Albinstone M Sangma, Netji M Marak, Mon Bahadur Newar sagi , Brewingson M Sangma, Arshid P Marak sagi , Lambert K Sangma sagi , Bokrin R Marak sagi , Patrick R Marak sagi , Ashabendro M Mommin sagi , Mereni R Marak sagi , Clifford R Marak sagi , Masonsing M Sangma sagi, Throbish R Marak sagi , Barol D Shira sagi , Chandana Arengh sagi , David Ch Sangma, Filimina B Sangma, Blessibon R Marak, Eunice R Marak sagi , Veronica Ch Momin, Meena R Marak sagi , Kyrus Ch Sangma, Sukbir Rai sagi , Dolbir Rai sagi , Deben Hajong, Nidhuram Hajong, Deochand Teli sagi , Pohora Diwani Hajong sagi , Gajendra Hajong sagi, Lal Behari Hajong sagi, Rameshwar Hajong sagi , Janardhan Tiwari sagi , Khelaram Barman (Hajong) sagi , Jogobandu Barman (Hajong) sagi and Dhabeol Barman (Hajong) sagi maangna Meghalaya Day-ko maniani salo mande ra•e mitelpilskaaniko dakangaha.
Ia gisik ra•beani salo a•songna ring•mittelani gitrang aro doka dam•anirangko dake mesokangaha.
Unbaksana ia gisik ra•na kragipa Meghalaya Day-o Tura-ni MDC Bernard N Marak, West Garo Hills-ni Additional Deputy Commissioner Mary T Sangma aro EAC-rang:- Dimse A Sangma, Rezia Ch Sangma, Mary Liza K Marak, Dolrich B G Momin, 2nd MLP-Battalion Goeragre-ni Commandant S Rynjah, line department-rangni officialrang, district-ni officialrang, Hill State Movement-ni Membor-rang, Volunteer-rang aro uamangni nokdangni manderang, senior citizen-ni manderang aro Garo Hillsni bang•a dilgiparang Meghalaya a•dokni bilsi 50 gapaniko manina gita uamang bak-ko ra•angtokaha.