Shillong, Mar 7, 2023:A•doko gital sorkariko rikna gita Meghalaya Democratic Alliance (MDA-II), mongsonggipa daitorangko ra·e kamrangko ka·angna Sombar salo, Cabinet-na NPP-ni sak 8-na biapko a·kangaha. Uandake, UDP-na ge 2, HSPDP-na ge 1 aro BJP-na ge 1-ko cabinet-o sualna gita tik ka·angaha.
Gital sorkariko bakrime riktaina gita skanggipa tom·aniko Sombar salo ong·atani ja·man, skotong minister Pa Conrad Sangma-ni kobor ra•timgiparangna aganani gitade, gnigipa changna bakrime sorkariko riktaina, MDA-II.0-o bakrimegipa gimikan namniktokaha ine parakataha.
Sak 12 MLA-rangoni, NPP-na sak 8, UDP-na sak 2, HSPDP-na sak 1 aro BJP-na sak 1-ko cabinet-o biapko on·na gita tik ka·angaha. Indake cabinet-na MLA-rangko sualani bewalo pangchake dakaha. Indiba PDF-oni darangkoba cabinet-o tikatna man•jaha ine Pa Sangma parakataha.
“Cabinet berth-ko man·gipa sak 12 minister-rangoni, skotong minister-ko man·chape sakbride Garo Hills-oni, sak 8 Khasi aro Jaintia Hills-oni ong·a,” ineba skotong minister parakataha.
Indake MDA-II.0 sorkariko chairman ong•e, dilgipani agan ku•pattiani gitade, Assembly-o agan-chalaitimgipani gimin election-ko ong·atani bidingo party-ni gisepo chanchie ra·chakangaha ine u·iataha. Uni gisepon agan-chalaitimgipani biapna NPP bimingko mingsoaha aro uko ra·chakna gita bakrimegiparang baksa agan-golpochina angko bil on·aha. Je somoio uamang baksa agangrike, ra·chakani ja•mansa Speaker-ni post-na bimingko parakatgen ine NPP-ni padot parakataha.
Indake ong•engon, sorkariko rikchakatna gita Common Minimum Program, Coordination Committee iani bidingo pilak nangchongmotgiparangni giimin agan-golpogrikna gita MDA changsatai apsan asonge tik ka·angtaigen ineba Pa Sangma kobor ra·timgiparangna aganaha.