Baghmara, July 11, 2022:Mnisal Sonibar salo South Garo Hills a•jani pulisrang mande saksani manggisiko Simsang Chibimaoniko man•aha ine u•iataha.
Kobor man•soani gitade, mande saksani manggisi Simsang Chibimao balboe dongengako jolni manderang nike pulisna u•iataha. Kobor man•soe pulisrang ua biapona re•ange, ua manggisiko Simsang Chibimaoniko ra•doaha. Ua manggisiko chioniko ra•doahaon, bilsi 50 ong•gipa Joren Marak-ni manggisi ong•a ine jolni manderang ma•siaha.
Ua mande bilsi 40 mangna jabolrangko gale cha•engachim aro ua Baghmara bajar gitalo dong•engachim. Indita bilsirangna Baghmara-o donggenchimoba, uni ma•drang mahariko darangba ma•sija ine songni manderang u•iataha.
Ua mandeni manggisiko ma•drang maharina on•atna man•na gita Baghmara PRC-ko u•iatchina South Garo Hills a•jani SP Rithuraj Ravi mol•molataha.
Ua mandeni siani bidingo pulisrang maming ong•gija kamrangko ma•sikujaenga, indiba post mortem report-na sengkuenga ine SP u•iataha.