Ampati, March 10, 2022: South West Garo Hills a•jao donggipa Samalchiring songni mande saksako ma•sina man•gijagipa denggu mande monggolbar walni 9:30 bajimango phone ka•e goe galna ka•mikkenatahani gimin Kalai Out Post-o badi ka•aha ine koborna u•iataha.
Koborna u•iatani gitade, Samalchiring songni Tenggrik Momin-ko ma•sina man•gijagipa mande silaichi goe galgen ine 6360603575 mobile number-oni phone ka•e ka•mikkenatahachim.
Indake ma•sigijagipa mandeni phone ka•e ka•mikkenatani gimin Tenggrik Momin kenjagoke an•tangni janggina aro nokdangni manderangna naljokaniko on•china budbar salo Kalai Out Post-o badi ka•aha ineba u•iataha.
Uandake maming dos grigipa mandeko skatang so•ote galna ka•mikkenataniko man•ahani gimin Tenggrik Momin ua obostani bidingo sandianiko dake ka•mikkenatgipa mandeni kosako raka ja•kuko de•angchina pulisrangko mol•molangaha.