Mamata Banerjee Mukroh-o a•sel ong•aniko jegale, sianggipa nokdangni manderangna kalimpaaniko parakata

Kolkata, Nov 26, 2022: West Bengal a•dokni Skotong Minister aro All India Trinamool Congress (AITC)-ni Spoke Person, Mamata Banerjee, November 22 tariko West Jaintia Hills a•jao donggipa Mukroh songo dos gri sak 6 manderangko Assam pulisrangni ka•saninggija so•ote galanina jegale an•tangni gisiko duk ong•aniko sianggipa nokdangni manderangna parakataha.
“Angni gisik ka•tong gimikchi Mukroh songo sianggipa nokdangni manderangna kalimpaaniko parakatna sika. Meghalaya sorkari bilko mesoke a•dokni manderangko ma•kimaatenga, uni gimin mikkangchi Meghalaya sorkari a•doko tom•tomaniko ra•bana nanga” ine Mamata Banerjee tweet ka•ataha.
Unbaksana, AITC-ni National General Secretary Abhishek Banerjee, Mukroh-o Assam pulisrangni chadrape a•sel ong•aniko knasoe, jagokmanpilaha aro raken jegalatenba an•tangni gisik ka•tong gimikchi duko ga•akenggipa nokdangni manderangna kalimpaaniko parakataha. Mikkangchi indakgipa a•selrang ong•taijachina, MDA sorkari sima ari jolrango songdongenggipa manderangna naljokani aro chel•chakaniko on•na nangchongmota, ine Abhishek Banerjee MDA sorkariko mikkrakataha.
Unbaksana, Abhishek Banerjee, MDA sorkarini kamko jegalatenba, a•doko tom•tomaniko ra•bana man•jani a•selsa iandakgipa obosta Mukroh songo ong•aha. Uni mikkangchi MDA sorkari a•doko tom•tomaniko aro chel•chakaniko ra•bana nangchongmota ine Abhishek Banerjee tweet ka•ataha.