Mallangkona, April 14, 2022: Meghalaya a•dokni Skotong Minister Conrad Sangma, A•king Nokma, Sordarship, Shyiemship, Doloiship aro songni nokni manderang baksa maming chanchirima gri an•tangni sika gita, skangoni Meghalaya a•doko songdongenggipa Mallangkona, Langpih, Maikhuli, Borpathar, songrangko Assam a•dokchi watatna re•anggipa March 29 tariko Assam-ni Skotong Minister Himanta Biswa Sarma baksa ma•mong sorkarini Home Affairs Minister Amit Shah-ni mikkango Memorandum of Understanding (MoU)-o soi ka•ahani gimin Mallangkona songni manderang April 13 tarik Budbar salo jinma re•jome Conrad Sangma-ni kosako raken jegalangaha.
Ia jinma re•jomanio Mallangkona songo duk mikchi ong•e aro ka•oksie dongenggipa manderangna, AHAM Aradonga Regional Unit aro FKJGP Langpih Circle-ni dilgiparang re•bae chakpaaniko on•angaha.Ia obostani bidingo AHAM Aradonga Regional Unit-ni President aro FKJGP Langpih Circle-ni President, Mallangkona jolni manderang jedake dabiengachim, apsandaken chakpaaniko on•ne pilak kamrango apsan kamrangko ka•anggen ine ku•rachakangaha. Conrad Sangma saksan songni nokni manderang baksa chanchirimgija aro sing•cheng sanchenggija Meghalaya-ni a•arangko Assam-chi pakwatatna man•jawa aro Conrad Samgma Meghalaya a•dokko pale cha•na mai bil donga, ua Sixth Schedule-ni niamko ma•sijama, Sixth Schedule a•jao sorkari maming dakeba songni Sordarship, Shyiemship, Doloiship aro Nokmarango sing•chenggija sangchenggija Skotong Minister ong•oba skatang palna aro on•na maming bil dongja.”Chinga Conrad Sangma-ni kamko raken jegala aro MoU-o soi ka•giminko ra•galchina dabia, ong•jaode chinga bilaken dakgrikanggen” ine NGO dilgiparang parakataha.
Mallangkona songni dilgiparang changni chang ia obostani bidingo Conrad Sangma-ko gronge mol•molahachim, indiba 2011 bilsio Congress sorakri je sima ariko sale donangahachim, uano pangchakesa Meghalaya-o napgijagipa songrangko Meghalaya-o napatna man•jawa ine Congress sorakriko pa•sikaha. Anga 2011 bilsio je songrango ari sale donangaha, uano pangckahesa kamko ka•agen aro uako ka•genchimoba songni nokni manderang baksa ku•mongesa, na•simangni namnika gita kamko ka•gen ine ku•rachakachim. Indide Conrad Sangma da•alo maina manderangni nangnikaniko ra•gija an•tang saksan MoU-o soi ka•aha. 1972 bilsioni Meghalaya a•doko songdonggipa manderangko maina Assam-chi watatskaenga, Meghalaya a•dokni man•gimin Meghalaya-ni a•arangko maina Assam-na palskaenga? Ua saksa dilgipa ong•e, Meghalaya-ni ma•ambiko ma•sijama. Meghalaya sorkarini on•enggipa pilak scheme-rangko Mallangkona songo man•nenga aro Meghalaya-on voter id-card-rangko man•ne, eleksin ong•chengaoni da•alona vote-rangko pu•onbaenga. Uni gimin Conrad Sangma manderangni nangnikako ra•gen aro Regional Committee-ko songe uamangchi sing•sandianiko dakgen ine ku•rachakachim, indide da•alo Conrad Sangma maina 2011 bilsio survey ka•a matchotgijako rang•gittik MoU-o soi ka•aha, Meghalaya a•doko songdongenggipa manderang da•osa Conrad Sangma-ni togiako ma•sijok, ua jatna aro a•songna ka•sagipa skotong minister ong•ja, jatko togie an•tangni namgnina chanchiaigipa Skotong Minister ong•a. Chinga Meghalaya a•dokko man•chengaoni da•alona kingking Meghalaya a•doko songdong a•chaenggipa manderang ong•a aro chinga maming saloba Meghalaya-ko wate Assam a•dokchi re•angjawa.ia kajia golmalko ra•bagipa Conrad Sangma-an ong•a, uarangko sandina Regional Committee-ko songe, Regional Committee-chi sandiako daksa kamko ka•gen ine aganachim, indiba da•alo maina Regional Committee-ni sandiakio ra•gija an•tang saksan Delhi songjinmaona re•ange MoU-o soi ka•aha.
“Chinga maming saloba Meghalaya-ko wate Assam-chi re•angjawa ari MoU-o soi ka•giminko ra•galpilna nanga, uko ra•galpilja dipet jingjengataniko dontongjawa. Conrad Sangma namen chingko tol•aha aro mai miksongao chingko Asaam-chi watatenga. Chinga Meghalaya a•dokko man•chengaoni da•alona Assam-ni sima ario ong•genchimoba Meghalaya sorkarini pilak dakchakanirangko man•ne janggi tangenga. Indide maina chingko Assam a•dokchi palatenga. Uni gimin MDA sorkariko dilenggipa Conrad Sangma aro Preston Tynsong, Mellangkona songo duk mikchi ong•e aro ka•oksie Assam a•dokchi watgalataniko ra•chakna man•chongmotjawa ine parakataha.
Uni gimin Chingko Assam-chi watatpanabe, chinga A•chikrang Meghalaya a•dokni ong•chongmota” ine Mallangkona songni manderang parakataha.